Ynne ka sngi, u Deputy Commissioner ka West Jaiñtia Hills da khut u ya ka yalang hapyrdi ka NHAI wa ki waheh ka Ialong kamjooh leh ka Jaiñtia Students Movement (JSM), ka All Jaiñtia Commercial Vehicle Association (AJCVA) wa kiwi kiwi hajrong i thmu wow sdang biang wow khrong dan na waroh ki kari.
Ya kani ka yalang da pynman ha Conference Hall ka yung krehkaam u Deputy Commissioner, West Jaiñtia Hills wei da pynlai ya ka da u ADC u MA Challam.
U Paila Lyngkot naka AJCVA hawa klam da ong u wa i phah booh FASTAG toh i wym ye wow pdiang neibhah ki sarok wa boon hi ha ka jylla toh wa chna da ka PWD wei ymtoh da ka NHAI wei ya ka kari wa wan na Assam, Shilong wa kiwi ki thaw ymye wow ong iyi iyi.
Neiliang kiwa kitkaam ka JSM da pyrchah bait ki ya i thmu wow khrong dan na ki paidbah ka Ri-loom Jaiñtia (East wa West Jaiñtia).
U Working President ka JSM, u Jimiral Kharmuti da ong wa u katkam i klam u Montri ka Ministry of Road Transport and Highways (MoRTH) u Nitin Gadkari, da ong u wa ymtoh u em ki Toll Gate hapoh 60 Km iwi na kawi. Da e nongmuna u wa ka Toll Plaza ha Diengpasoh wa kawa em ha Ialong jngai ki du kamwa 54 Km wei katwa na Ialong hadooh ka Toll Plaza ha Lumchnong jngai ko du hapoh 56 Km.
Da ong chooh chooh u wa ki chnong kiwa em hajan ka Toll Plaza toh u pynlait ya ka dan, wei da ong u wa uni u sarok na Jowai cha Ratacherra man uwa sih bha khamtam na Khliehriat, wei emkaam leh ya ki luti wow lai-kjat, ki dooid wa kiwi kiwi.
U General Secretary won yong ka JSM, u Roytre Dkhar da ong u ileh ha Ri-Bhoi nadooh ki kari samen wa ki kari kamai ym em u su ki tæ weileh phær ka aiñ mo neibhah ha Jaiñtia Hills hap dei su.
Neiliang u Elnathan Pale na ka chnong Ialong da u wa ha ka yalang warim da rai wa ya ki kari Taxi ML-04 ym emkaam ki wow su tangwa kiwi won emkaam u su ki du T. 30 wei ye ki wow lai katwa ngait ki tangwa ini won da man ko mar dei kangtleiñ.
Ki waheh ka Ialong da ong ki wa i lait u su dan ha kani ka thaw da ktah ko leh ya ka tulop yong ki khynnah kiwa kreh ha kani ka thaw.
U MA Challam da pynkynmoo u ya ka NHAI wa ka sorkar da thoh ko cha ka NHAI wow chna ya ki luti lai-kjat ha tymbud ka sarok Ialong wei khamtam ha Jowai Civil Hospital Ialong wei ka bai thaw leh da em ka poisa ha ka sorkar neibynta ki tre thaw. Hajrong ini u Project Director ka NHAI da taklaiñ noh u ya ini i kaam.
Hawa kut u ADC da ong u wa neidaw wa da jan ka Election MLA wei wow pynneh yei chongsuk da rai noh wow pynneh chwa katkam wa man katni hi (Status Quo) kat hadooh wa ka Agency wa khrong dan wa ka NHAI u ye ki wow wanrah deiwi tawon i rukom krehkaam.
