Shillong: U Medical Superintendent (MS) ka North Eastern Indira Gandhi Regional Institute of Health and Medical Sciences (NEIGRIHMS), u Prof. N Topno da pyntip u wa ka President yong ka Civil Society Women’s Organisation (CSWO), ka Agnes Kharshiing da rap khlan bor wei da ye u sumaar hadooh 60 percent iwa mynsoo ko nadooh wa wanrah ya ka ha kani ka thaw sumaar.
“Dang emkaam wow haap pait bniah bha ya i chait i khiah yong ka Agnes, kamwa man kattæ i da ye i wow pynchait kamwa 60 percent na iwa man ko ha i por wa wanrah ha kani ka Hospital,” da pyntip u MS hawa klam wa kiwa thoh khubor ynnin ka sngi.
U Prof. Topno da pyntip u leh wa i joor i mynsoo yong kini ki ar ngut toh neibynta i khlieh, wei ka Agnes da rap mynsoo ko leh na chrooh, i bynta yong ka kti wei da toh leh ko leh malu mala na kiwi ki bynta i doh i pran ko wei i chitom da joor i nei dooh snaam ha ka sngi wa chah thombor ko.
“Ha chwa wow yoh ya ka sumaar da ieh kamwa palat 5 kynta wei i dooh snaam man i iwa joor ha katu ka sngi,” da ong u Prof. Topno.
U MS da pyntip u leh wa ka Agnes dang emkaam ko wow chah pooid ha ki bynta ka kti, tangwa ki doctor ki dang bichaar bniah bha ki chwa wa lada ym pu yoo hoi daw haap ieh chwa.
“Ka Amita da rap khlan ko bar ya Agnes hanlada dang booh ya ka ha ka Surgery ICU. I booh ya ka Amita ha ICU hadooh katni hanlada da rap khlan ko toh neidaw yow rap sniaw chngaaiñ ko,” da ong u Prof. Topno.
Hei yatoh won i wan u Additional Deputy Commissioner (ADC) ka East Jaiñtia Hills District wow takit na ki tai ki ar ngut, neiliang u Prof. Topno da ong u wa da phah ya uni u sahep wym hoi u pynwit namo wow takit ya ka Agnes neidaw wa dang em ko hei chitom tangwa da e laad ya oo wow takit u ya ka Amita neidaw wa da khlan ko bar ya ka Agnes.
Discussion about this post