Da saam ya ki tiar wa ki kor rep cha ki 13 tylli ki IVCS

U MLA ka Jowai, u Wailadmiki Shylla ha ka 25 tarik uni u bnai da saam u ya ki tiar wa ki kor rep namo ki Agri-Tools wa ki Farm Machineries cha ki 12 tylli ki IVCS (Integrated Village Cooperative Societies) kiwa na Thadlaskein wa Amlarem Block ha Tyrchi Inn, Khliehtyrchi ha ka yalang wa pynman da ka District Project Management Unit (DPMU), West Jaiñtia Hills District.

Hawa e yei klam, u Wailadmiki Shylla da yaroh u ya ki chnat sorkar wa ki IVCS kamjooh ki warep yei ya krehlang wow ku hei yoh i laa yong ki wei da pynchlur u leh ya ki warep wow krehlang wa ki khon ki kti ki yow man ko kam ka laad im-ja ya ki leh kamjooh. Da e buit u leh ya ka DPMU wow pynman ya kam kini ki yalang ha ki yaaw ki haat yow yoh lang kiwi ki warep u ap u sñiaw.

Neiliang u Deputy Commissioner, u B.S. Sohliya da kyntu u ya ki IVCS wow chimkhia ya kini ki tiar kam ki tre wei heiyatoh wa i pynlai yaaw ya ki mar daw khut u yaka yalang deilang waka DPD, M-LAMP Project kamjooh kiwi ki chnat sorkar wa emkti ha ini i kaam wei da pynsñiaw u leh yei kmen wa da sñiawthooh ki IVCS wow pynemkaam ya ki Credit wa Debit Card.

Ka E. Buam, Deputy Manager, DPMU da khana ko wa kini ki tiar wa ki kor rep kiwa da saam cha ki IVCS toh kiwa da bhah ha ki ar bynta heiwa ha ka Phase-I da em 8 tylli ki IVCS kiwa da yoh ya kini wei ha ka Phase-II won da em 5 tylli ki IVCS kiwa da yoh.

Related posts

Kyntait ka Agatha Sangma wow man ka kyrtong MP cha Rajya Sabha

May 29, 2025

Pynlait ka sorkar Rs. 20 klur cha ka JHADC, sa Rs. 19 klur ha ki tayaaw wow wan

May 21, 2025

U S. Rani, District Horticulture Officer, da khana u wa 9 tylli ki IVCS da jied kam ki wow rep syiñ ha ki thaw wa da jied hapoh ka Thadlaskein Block, heiwa 5 jait ki syiñ daw rep kam chibynta wow pyrchang wei wow thooh bniah. Da khana u leh wa ki IVCS da yoh ki ya ki symbe hei dor wa duna wei daw yarap leh ya ki lyngba ka Directorate of Food Processing wow song wei wow pynlai yaaw ya ki mar wa da pynmih ki.

U A. Suting, Deputy Project Director, M-LAMP da ong u wa ka thong yong kani ka Project toh wow pynjanai ya ka yaaw ki warep. Da e buit u ya ki warep wow rep ya ki mar katkam wa dawa ka yaaw yow yoh myntoi ki. Da ong u wa emkaam wow thooh yutip kammon wow pynlai yaaw ya ki mar yong ki.