Jowai: Hajrong ka thong yow pynjan i chakri ki Bank cha ki paidbah lyngba ki Business Correspondent Agent (BCA), neiliang ka District Mission Management Unit-West Jaiñtia Hills, lyngba ka Meghalaya State Rural Livelihood Society (MSRLS), chirup i krehlang ka NABARD waka Meghalaya Rural Bank, ynne ka sngi da saam ki yaki Micro ATM chaki 14 ngut ki Business Correspondent Agent yong ka West Jaiñtia Hills District haka yalang wada pynman ha Conference Hall u Deputy Commissioner.
Kini ki Business Correspondent Agent toh naki Self Help Group kiwa da tipmit daka MSRLS, wei i kamram yong ki kam ki BCA toh u yarap yaki paidbah cha ki thaaiñ nongkyndong heiyatoh wa ki kaam Bank wa kynthup nadooh i wai Account, i sai poisa, u chim ram wa kiwi heiwa ki paidbah ym emkaam de ki u lai mih da ki hi chadooh cha ki chnat krehkaam ki Bank.
U K. Kharbuli hawa e yei klam neiliang ka Bank da kyntu u yaki BCA, wa chisien wa da chim ya kani ka kaam, iwa kongsan toh u man kiwa bait wei biang ka rukom pynlai pynwan, wei lada em iwon iwon i bakla leh toh u pyntip chaka chnat krehkaam.
“Ka mynried yong ka Bank chaniah ko ha phi ki BCA neibah phi toh kiwa ye u poi cha kdong cha chmiang yow jan cha u paidbah, nalor wa boi daw poi i por wa kam ki BCA hap ki wow kreh wot ha sor kamjooh, neibhah katkam ka juk katni boon hi i emkaam ki bru da pynpoi bait ha yung,” ong u Kharbuli.
Iwa kam ini i rukum pynjan cha ki paidbah da sdang u pyrchang heipor wa em ka khlam COVID-19 ha chnong Mynska dei yakrehlang ka chnat Rural Bank Shangpung, da khana u R. Shadap, District Mission Manager, MSRLS.
U PK Boro Additional Deputy Commissioner, WJH da yooluti u wa kani ka thong u man ko kawa lai bait lai ryntih wei daw pynmyntoi ko ya ki paidbah.
Kiwi won wa e yei klam kynthup ya u G.N. Kharlukhi, Manager ka NABARD wa kiwi.
