Ki arngut ki waheh ka chnong Mukroh kiwa da mynsoo nei chah sait kuli ha ki pulit Assam ha ka 22 tarik u Khonchonglad, da khlan da yoh bor biang ki wei daw yoh ki u mih noh na Hospital ha kini ki sngi wow wan.
Ya kini ki ar ngut da lai pait ynne i janmiet ka 7 tarik da u MLA ka BJP na South Shillong uwa man leh u Montri ha ka sorkar, u Sanbor Shullai heiwa da e yarap u leh da ka poisa wa mar T. 10,000. Ki arngut kiwa da mynsoo toh u Elias Samayang wa u Cheni Nartiang, ya kiwa da sumaar ha NEIGRIHMS hadooh katni.
Ya kini ki ar ngut kiwa mynsoo, ka sorkar da chim ko wow su ya ka bai sumaar, tangwa hadien i lai pait wei ap yei eh yong kiwa ha-yung yong kitai ki ar ngut, neiliang u MLA ka BJP da ong u wa daw yaklam u mynstep wa u Montri Rangbah, u Conrad K Sangma yow e u leh da ka yarap poisa cha kitai ki manyung.
Ha ini i lai, da synraan ya u Montri da kiwa yahkhmat ka BJP, kiwa pynlai ka Hospital wa u Medical Superintendent ka NEIGRIHMS, u Dr. C. Daniella uwa da batai yei long i chait i khiah yong kitai ki arngut, heiwa da khana u leh wa uwi na kitai daw yoh u mih noh mynstep ka sngi katwa uwi daw pynlait noh ha ki kajiak sngi wow wan.
