Kam chibynta wow pynchlur ya ki khynroo khyllood wei wow e i sap i tap ha ki wow seiñ khih ki da i yong ki hi najrong ka puræ puthi, da sdang da ka DIKSHa Beauty Care Course wa kyrchaan da ka Dalmia Bharat Foundation deilang ka Entrepreneurship Cell kawa em hapoh i pyrtuid ka PRIME Meghalaya, wei da wan wow wai ya ka da ka MDC ka Rymbai Khliehriat, ka Violet Lyngdoh ha ka yalang wa da pynman ha Jaintia Eastern College, Khliehriat.
Ka Violet Lyngdoh hawa e yei klam da yaroh ko ya ka Jaintia Eastern College yei wanrah ko kam kani ka jait e sikai yow pynchlur ya kiwa lai puræ wow em ki katæ ka mynsien wow seiñ khih dei yong ki hi.
Da ong ko leh wa manda em kiwa sdang khih, daw yoh kreh leh kiwi, kamtæ da pynchlur ko ya kiwa lai puræ wow chim kabu ki yeini neibhah hawa sdang ya iwon iwon da sdang chwa deiwa khian.
Ka Assistant Commissioner ka East Jaiñtia Hills District, ka F. Wann leh da e yaroh ko ya ka College yeini wa chynna jngai ko wow sdang ya kam kani ka e sikai kawa daw yarap leh wow pynyoo luti kammon wow seiñkhih ha ki por wow wan.
Da yooluti ko leh wa ka College leh daw sdang ko sa kiwi ki jait sikai kiwa daw yarap ya kiwa lai puræ u seiñkhih ki.
Neiliang uwa mihkhmat ka Dalmia Cement (Bharat) Limited, Meghalaya, u Pramod Kumar da ong u wa ka Dalmia Bharat Foundation toh kawa em ka thong wow yarap ya ka imlang sahlang wei da pynchlur leh ya kiwa lai puræ wow lai pynpliah chooh chooh cha baar ka District, ka jylla kamjooh hapoh ka ri.
Discussion about this post