Kam chibynta wow pynkupbor ya kiwa chong chnong yow tip ki yeiwa emkaam deiwa suk, neiliang u A.K. Singh, IAS, SDO (Sadar), East Jaintia Hills, District hapoh i yahkhmat u Deputy Commissioner ka East Jaiñtia Hills District ynnin da sdang ki ya ka WhatsApp Chatbot wa tip kam ka “EJHD Assistant Bot” ha ka yalang wa da pynman ha Video Conference Room ka yung krehkaam u Deputy Commissioner, Khliehriat.
Neiliang u A.K. Singh da khana u wa kani ka EJHD Assistant Bot toh kawa kyrpang neibynta iwa emkaam ki paidbah ka District yow tip ki chaphang ki Scholarship, ki Grant sorkar wa kiwi kiwi wa da e da kiwa boon ki chnat sorkar nadooh ka yung krehkaam u Deputy Commissioner, ka Block Development Office, ka yung krehkaam u District Social Welfare Officer naka yung krehkaam u Assistant Labour Commissioner wa kiwi kiwi de.
“Kini ki laad yarap wa da e lynbga ka Chatbot u kynthup ko leh ya yow yoh ST Certificate, E-Shram Registration, ki kaam wa yatoh wa u Aadhaar, i yaleh EPIC Card, u e laad leh u ujor ki paidbah, u paan bor, u yoh yarap hawa chah ktah ha ki bor rymaw wa ki Insurance Scheme ka sorkar kiwa ye u leh lut waroh hapoh ka “EJHD Assistant Bot”, da ong u A. K. Singh.
Yow ye u leh ya ini waroh, ki paidbah ye ki wow pynemkaam da u WhatsApp deiwa phah ya ka Message wa ong “Hi” cha u 9233515972 yow ye u sdang yaklam heiwa ki paidbah daw yoh ki wow jied ya iwa emkaam ki.
Lyngba kani ka Chatbot daw tip leh kiyi ki kot ki sla wa emkaam yow yoh myntoi na ki Scheme sorkar iwa daw pynyoo leh iwi pa iwi wa emkaam u leh nadooh wa sdang wei lada emkaam chooh chooh daw khana kammon wow yaklam wa ki heh sorkar.
