Haka yalang wada khut pynman da ka Society for the Study of Law (SFSL), West Jaiñtia Hills ynne ka sngi ha Chutwakhu Indoor Sport Hall, wada emlang ki waheh chnong waphær waphær, ki seiñbhalang wa kiwi wow yaklam hajrong i emkaam u yoh National Law School ha Ri-loom Jaiñtia, da iwi i sur da rai ki u sdang yaka Demand Committee, Jaintia Hills ka wow man ka Committee kyrpang heiyatoh u lai luti chakhmat yow dawa booh National Law School hapoh Ri-loom Jaiñtia.
Hapoh kani ka Demand Committee, Jaiñtia Hills ki dkhot yong ka kynthup ya waroh ki dkhot EC ka Society, neitæ arngut na ka wi ka seiñ kam ka JSU, JSM East wa West Jaiñtia Hills, ka FKJGP Jaiñtia Hills Unit waka KSU Jaiñtia Hills. Da kynthup leh ya u President wa u Secretary ka Synjuk Waheh Chnong Jaiñtia Hills kamjooh yong ka Synjuk Waheh Chnong Jowai, kiwi tawan ki bru waheh kynthup ya u S.K. Lato, u Chel Singh Langi, u Dame Hiwot Pde, u Philanderwel Lyngdoh, u H. Toi wa u Dr. Phervision Nongtdu.
Chwa ini neiliang ki dkhot ka Society for the Study of Law (SFSL), West Jaiñtia Hills chim ki leh ka laad u batai pynsñiawthooh heiyatoh wa kani ka Society kawa da seiñ hajrong ka yurim u pynku i sñiawthooh heiyatoh ki aiñ kanun, wei kamjooh leh da khana ki heiyatoh i lai luti ka 12-Daloi Law College wa em ha Jowai.
Neitæ da pynsñiawthooh ki leh heiyatoh waka National Law School kawa da angnood ki u e ka sorkar wow booh hapoh Ri-loom Jaiñtia.
