Ka Online Reporting System ka Meghalaya State Food Commission da sdang ya ka ynne ka sngi da ka Meghalaya Chief Secretary, ka R. V. Suchiang ha ka yalang wa pynman ha Main Secretariat Conference Hall, Shillong deiwa emlang u Chairman ka Meghalaya Food Commission, u P. S. Thangkhiew, IAS (retd) wa kiwi ki heh sorkar.
Deiwa leh ya ini i phah ya ki bui (Report) lyngba ka Website, daw pynsmat ko leh wow pynkreh ya kiwon kiwon ki ujor ki paidbah lyngba ki District Grievance Redressal Officer kiwa pait yei ood ki paidbah hei saam khoo wa kiwi ki marbaam katkam ka aiñ National Security Act 2013.
Hawa e yei klam, ka R.V. Suchiang da ong ko wa deiwa pynkrehkaam ya ini i rukom krehkaam wa thymme daw pyntikna wa i chakri ka sorkar u poi ki cha waroh hei por wa duna tam. Chooh chooh da ong ko wa ka Commission daw pynmiat chooh chooh ko ya kani ka Online Reporting System yow pdiang ya ki Report na ki District Grievance Re-Dressal Officer (DGROS), deiwa ong wa ini wa sdang toh iwa lai cha ka luti wa biang.
Deiwa khana wa ka Commission da pynkreh ko leh ya ki kyndon ka National Food Security Act 2013, da ong ko wa hapoh ka Meghalaya State Food Commission, ha u 2016 da yoh boon ki ujor wa yatoh waka Mid Day Meal Scheme, i wym biang i rukom thaw khia kam ha ki dukan rachon (Fair Price Shop) wa kiwi de kiwa da chimkhia da ka Commission.
