Ka Flybig kawa pynhær ya ka lieñsuiñ na Shillong cha Delhi da pteiñ biang ya ka hadien wa hap sangeh heiwa da sdang nyngkong ha ka 21 tarik u Kmaichonglad (Dec) u snem 2020 tangwa da hap wow sangeh du hadien wa da hær ko 16 sien neidaw wa da pynkhor ya ki kyndon yada na u COVID-19.
Kamtæ nadooh ka 2 tarik uni u bnai da sdang biang wow hær na Shillong kawa da man leh kam ka chnong kawa 8 kawa hær ka Flybig ha ki chnong ki jylla ka Northeast heiwa kiwi toh 4 tylli ki chnong ha Assam, 2 tylli ha Arunachal Pradesh wa kawi ha Tripura.
Neiliang ka sorkar da dep phah ko ya ka Show Cause Notice cha ka Flybig yei sangeh ki wow hær heiwa da dep e por leh ya ki wow jubab ki wei iwa chem chitom ka Flybig toh neidaw wym em ki da ka yong ki hi ka lieñsuiñ heiwa da hap ki wow chim wai naka Spice Jet da ki jait lieñsuiñ wa tip kam ki Bombardier Q400.
I lai na Shillong cha Delhi toh iwa arsien chi tayaw kamjooh leh i lai na Delhi cha Shillong ha ka sngi Monday wa Friday.
Na Shillong cha Delhi toh iwa mih heipor 9:20 i step deiwa poi ha Delhi heipor 12:25 pyrdi sngi. Na Delhi cha Shillong toh iwa mih heipor 12:55 i sngi deiwa poi ha Shillong heipor 04:20 i janmiet wei i bai lai waka bai wan chongdor i T. 9998 + Tax.
