Jowai : Ka lympung yakop Kickboxing wa 19 da man ko leh ka sien wa ar wa man ko ha Jowai nadooh u snem 2001 ynne ka sngi da wan wai ya ka da u A. Shullai ha Khimusniang Indoor Sports Hall, Jowai hei emlang u ma Marki Mulieh, MDC JHADC deilang wa ki dkhot ka Meghalaya Association of Kickboxing Organisation (MAKO) wa ki wa wan chimbynta na kylleiñ ka jylla.
U Donny R. Ranee, President ka MAKO ong u wa daw jied na kani ka yakop ya ki wow yoh u mihkhmat ya ka India ha ka yakop World Association of Kickboxing Association ka wa daw pynman ha Poland ha u snem wa daw wan.
Kawi na ka phang wa kongsan yong kani ka lympung Kickboxing toh yow pynman ya kani ka yalehke kam ka laad kamai ya ki khyroo khylood ka jylla yow lait ki nei ngat ha ki kaam wa sih wa boon jait. Hei yatoh weini u A. Wallang SI, Jowai Police Station ong wa katni ha Jowai da boon ki khyroo khyllood da man ki kiwa dih drugs neidaw wa ym em thong ki ha i rta yong ki wa man ka sngi. Ong u wa lada em i ka-it mynsien heiwon heiwon ki kaam ymtoh u kut i du kattæ donhi neibhah toh u yoo jngai wei u chimkhia ya ki sap wa da em i. Da pynchlur u ya waroh u man ki kiwa rai kut hei katwa em wa leh ki.
Ya ka parom wa sdang ki jait yalehke Martial Arts da khana da u ma C. Pakyntein uwa man kam uwi na kiwa yaleh ke Taekwondo wa pawnaam yong ka chnong Jowai.
Da sdang ya ka yalehke ha kani ka sngi da ka Musical Form kawa man leh ka sien nygnkong wa pynman ya ha kani ka yakop Kickboxing.
Ha ka yakop da em nadooh kiwa dang 7 snem i rta hadooh kiwa 40 snem chynrang wa kynthai.
Da bynta ya ka yakop ha ka Point Fighting, Light Contact, Low Kick wa ka Full Contact.
Daw pteiñ ya kani ka Kickboxing Championship mynstep nadooh 8 waje i step wei daw pynkut ya ka heipor 4 waje i janmiet.
Discussion about this post