Wapungskur: Ka 8th Cash Prize Knock-out Football Tournament -2018 yong ka Moopynieiñ Socio-Cultural & Sports Organisation (MSCSO), Dong Moopynieiñ, Wapungskur, East Jaiñtia Hills District da sdang ya kani ka 4 tarik ha madan yong ka Dong Moopynieiñ.
Ya kani ka Tournament da wan wai pyrda ya ka da u Justine Dkhar, Ex-MLA 6 Khliehriat LA Constituency uwa man kam u kongsan ha kani ka sngi, heiwa da emlang leh u Riborlin Shylla na ka chnong Khliehriat, u Ohibait Dkhar, President KSU-JHD Unit, u Process Dkhar kam ki Special Guests, u Satly Ryngkhlem, waheh chnong Wapungskur, u MH Dkhar, President AJYWO-CB wa kiwi kiwi ki bru pawkhmat yong ka chnong wa na kiwi ki chnong kiwa chah khut sñiawbha.
Hawa klam u kongsan, da pynsñiaw u yei sñiawngooh ya ka dong Moopynieiñ kawa dang kynmoo maya wow khut ya oo kam u kongsan ha ka Tournament wei da e khublei u ya ka MSCSO kawa da chim ya kani ka laad wow pynchlur ya ki khynnah khynroo ha ki kaam yalehke.
Da kyntu u ya ki dkhot ka seiñ wow thooh yarap ki na u District Sport Officer wei neiliang yong oo daw yarap hi u wow booddien, kamjooh leh da kyntu u ya waroh kiwa chimbynta wow em ki ka mynsien yalehke neibhah ha ka yalehke daw em bait kiwa jop wa ki wa rem.
Ha kani ka sngi da yoh leh ya ki chaad tynre na ki khynnah skur yong ka K.B. Memorial Sec. School, Moopyniein, Wapungskur wa na ki khon khynroo ka Dong Moopyniein.
Ha kani ka sngi, ha ka yakhun kawa nyngkong yong kani ka Tournament, ka Iatyllilang FC da jop ko ya ka Sutnga SC da 4-3 da ka yachut Tie-breaker hadien wa kut ka yalehke khlem em wa yoh u thap kool.
Kiwa da wan wow chimbynta ha kani ka Tournament da em ki hadooh 32 tylli ki dhab na ri-loom Jaiñtia.
Discussion about this post