Jowai: Ynne ka sngi da sdang ya ka esikai wow pynemkaam ya ki Voter Verifiable Paper Audit Trial (VVPAT) hapoh ka Conference Hall ya yungkrehkaam u DC ka West Jaiñtia Hills heiwa da em u BJ Kharshandi, EAC wa u SC Laloo wa da pynyoo yei rukom krehkaam kani ka kor wow pynemkaam heipor wa thap Vote ha kani ka Election MLA wow wan.
Ya ka esikai wa nyngkong da e cha kiwa kreh ha ki bank wa ki seiñ saiñ hima sima.
Ha kani ka Election wow wan hapoh ka Polling Booth daw booh lang wa kani ka kor VVPAT kawa daw pynyoo cha kiwa thap Vote wa ka kor EVM ym em jied bakla ko ya u kyrtong wa jied ki paidbah heiwa hadien wa chon ki ya u kyrtong wa jied ki ha ka kor EVM, ka kor VVPAT daw pynyoo ko ya u kyrtong wa jied wa chon ha ka kot wei daw neh i 7 Sec wei hadien ini kani ka kot hap ko pynhapoh ka kor VVPAT.
Ini i em kani ka VVPAT ym em kylla ko ya i rukom thap Vote neibhah ki paidbah ym emkaam u tba ki ka kani ka kor, iwa phær toh haap yang donhi ki 7 Second hadien wa chon ki ha ka kor EVM yow pyntikna ka kor VVPAT wa ka EVM ym em bakla ko u jied ya u kyrtong.
Ki kot wa pynmih ka VVPAT ym toh kiwa ye ki paidbah u rah cha yung wei man ki leh kam ki Vote wei lada mih ka ujor kawon kawon wa ym hun ki kyrtong wa ye kheiñ Vote naka kor EVM ye won u ñiaw da ki kot wa pynmiha ka kor VVPAT.
Kamwa man kattæ hapoh West Jaiñtia da em 10 tylli kini ki kor kiwa daw rah kylleiñ ki thaw ki chnong wa ki thaw puræ yow pynsñiawthooh paidbah wow pynemkaam ya ki wei ini u pteiñ hadooh chwa wow poi ki sngi thap Vote.
Discussion about this post