Jowai: Kamwa ki pulit man ki ka chnat wa hakhmat dooh wa ki paidbah kyruiñ ki lada em iwon iwon i jia haka imlang sahlang, kamtæ neiliang ka chnat District Disaster Management Authority (DDMA) West Jaiñtia Hills District ynne ka sngi da pynman ko ya ka esikai kyrpang wa ar sngi neibynta ki pulit heiwa kammon u e yarap paidbah ki ya ki paidbah wa takhooh hawa ktah i bor pynjæd ka rymaw ha iwon iwon i por.
Ya kani ka esikai da pynman ha Conference Hall ka yung krehkaam u DC West Jaiñtia heiwa u S.C. Laloo ADC da man u kam u kongsan, hei emlang u District Disaster Management Authority u Ebormi Langshiang, u Assistant Dy. Controller Civil Defense u Joshwa Nongrum ki sahep wa kiwa kreh ka chnat pulit, ka chnat Fire Emergency Service wa ka Civil Defense.
U Ebormi Langshiang DDMA, da ong u wa ki bru kheiñstiñ ki hawa sñiaw yei kyntien Disaster næ i chah pynjæd tympra, tangwa da toh i por wow chimkhia neibhah i man i long ka rymaw da phær i kat dang lai ki por.
Chooh chooh da ong u wa i bor pynjæd tympra ym jia i du neidaw ka rymaw tangwa wot na i leh ki bru kamjooh.
Da ong u leh wa i daw wa khut kyrpang ya ki pulit toh neidaw wa ki paidbah nyngkong u kyruiñ ki cha ki bor pulit lada jia iwon iwon wei rap tip ki leh yei man i long waroh.
Da kdaw u leh ki bynta yong ki pulit wow leh ki lada wan kam ini i jia wa pynjæd ka rymaw.
Neiliang u S.C. Laloo kam u kongsan ngaitskem u wa i wan chimbynta ki pulit ha kini ki ar sngi wow pynlai yumut bha ki khnang wow ye ki u yarap ya kiwa chem chitom namo wow hikai ya kiwi tawon, ymtoh wow kheiñstiñ deiwa ong wa toh i mon u Blai.
Ya ka bynta wow e sikai da leh da u Joshwa Nongrum Assistant Dy. Controller Civil Defense uwa da batai hajrong kammon wow yarap ya ki bru wa chem chitom ha ki rukom waphær waphær, nadooh i e dawai First Aid, kammon wow pynemkaam ya ki tylle wa kiwi kiwi ki laad yarap.
Discussion about this post