Jowai : Ka Mookymphad Social & Cultural Sport Club, Mihmyntdu kam chi bynta wow pynchlur ya kiwa yalehbol kiwa da chongngiah yow mih pyrthai biang ki yow pynyoo ya i sap yalehbol kamjooh yow yoh ki yei chait i khiah ynne ka sngi da sdang ki ya ka 1st 35 Above Knock Out Football Tournament 2016 ha madan Wahryiong, Mihmyntdu.
Kani ka lympung toh du ya ki bru wa da em 35 snem i rta cha neiñ.
U President kani ka Sport Club u Carmel Suchiang da ong u wa sdang ya kani ka seiñ ha kini ki bnai wa da dep wei kani toh ka sien wa nyngkong wa pynman ko ya kam kani ka jait yakop dei thmu leh yow pynku ya ka yarong poisa kani ka seiñ.
Da wan wai ya kani ka Tournament da u Acting Dolloi ka Jowai Elaka u ma Puramon Kynjing uwa ong wa hei rta wa heh ka yalehke ym toh de da i bor toh da i buit wei heijooh i por ka yalehke pynwiar ko ya kiwa boon kiwa pynwit yei pyrkhat pyrdaiñ wa em ha ki bru wei deiwa man kiwa chait wa khiah yarap ko u man i kiwa khlan u yaleh wa kiwa boon i eh i khoo wa chem i man ka sngi.
Neiliang u Waheh Chnong u Lakhon Ryngkhlem won da ong u wa sñiawkmen u wow yoo ya ki dur kiwa yalehke ha madan kiwa da slem ym em de hiar madan ki wei ngait u ki sap yong ki dang neh hi ki.
Ha ka yakhun wa sdang ya kani ka Tournament da pynman ha pyrdi ka 2 Dolloi United wa ka Mukhla United. Heiwa ka 2 Dolloi da jop da 2-1.
Ka yalehke da man ko kawa yoosuk bha heiwa ki sap warim yong kiwa yaleh dang em hi ki kamjooh leh wei bor.
Ya ka yalehke da pynman mar 30 minit chi kylla .
Ha kani ka Tournament da wan chibynta 16 tylli ki dhab wei ya ka yalehke Final u pynman ha ka 31 tarik uni u bnai.
Discussion about this post