Ka kyrwoh na u G.K. Iangrai, MPS, Asstt. Inspector General of Police (A), Meghalaya da ong wa ki pulit da pynman ki yaka takit heiyatoh wa iwa jia haka Public Hearing ka Star Cement kawa da pynman ynne ka sngi.
Neiliang ki pulit da ong ki wa ynne heipor kamwa 7:30 i step, ki bru naka chnong Shymplong wa naka thaaiñ Narpuh deilang wa ki dkhot ka EJNC-CEC, HYC, STIEH, KSU wa FKJGP da yalang ki hajan ka thaw wow pynman yaka Public Hearing ha Khliehriat heiwa ki bor District da chah ki 50 ngut kiwa pyrchah wow e pyrtuid ki yow chimbynta haka Public Hearing.
Tangwa hadien wa sdang boon kiwa pyrchah kiwa da dawa wow yoh u chimbynta haka Public Hearing wei neidaw wym chah ya ki, da sdang ki wow pynkulmar heiwa ki pulit da pynemkaam ki dei bor wa khian yow pynpra yaki paidbah.
Ha ini, da em 7 ngut ki pulit kiwa da mynsoo kamjooh kiwa pyrchah wei da sdang u joor ka pyrchah manda psiah yabor kiwa pyrchah cha ka Public Hearing deiwa kbai yaki ktein pyrchah yow pynsangeh yaka Public Hearing.
Ki bru wa da psiah cha ka Public Hearing ym e laad ki wow pteiñ yaka Public Hearing hanla da pyrchang wow pynbait ya ini i kaam kamtæ da pynbna wa ym ye de wow pynman ya kani ka Public Hearing wei hadien ini da yapra noh kiwa pyrchah khlem da jia iwon iwon de iwa sñiawsih.
Da pyntip leh wa ki pulit da dep ki wow Register Case heiyatoh wa ini wa jia.
