Tura: U National President ka National People’s Party (NPP) uwa man leh u montri rangbah ka jylla, u Conrad K. Sangma ynne da lai yalap election u neibynta ka By-election ha Ampati Constituency neibynta u kyrtong ka Party u Clement G. Momin.
Da pynsñiaw u yei mynsien chaniah ha ki bru ya ka NPP wow kyrchaan ya u kyrtong ka party, deiwa ong wa daw pynkylla ya ka Ampati wei wow wanrah ya ki kaam pynroi hapoh kani ka thaiñ.
Chooh chooh da ong u wa hanlada ka Ampati man ko kawa da roi bha tangwa em chiboon iwa emkaam kam i stat i tip, i chait i khiah, ki kaam rep, i yoh kaam ki khynroo khyllood wa kiwi kiwi.
“Heipor ka Indira Gandhi, ka Congress da synchaar ko ha kiwa boon tylli ki jylla wei katni hapoh i yahkhmat u Rahul Gandhi wa u Mukul Sangma, ka party da hiar i synchaar ko wei da sah sa ar jylla donhi wa synchaar ko,” da ong u Conrad K. Sangma.
Da ong u wa ka NPP toh ka party wa thymme tangwa da em ko ha i synchaar ha ki le jylla ha ka thaiñ mihsngi wa kynthup ya ka Manipur, Nagaland wa ha kani ka jylla.
“Ka Congress da sdang wiar ko wei ki paidbah da sdang kyntait ki ya ka ha waroh ka ri, ym du ha Meghalaya,” da ong u Conrad.
Da lai yalap election u leh ha ki le tylli ki thaw heiwa da synraan ya oo da u Chief Adviser to the Chief Minister, u Thomas Sangma, u CEM ka GHADC u Dipul Marak, u Deputy CEM, Dolly K. Marak, u Bajengdoba MLA u Pongseng Marak, Ex-MLA ka Songsak uwa man leh u National Secretary ka NPP u Nihim D. Shira, u Siju Rongara MLA u Rakkam A. Sangma, u kyrtong warim ka BJP na Ampati Constituency u Bakul Hajong, wa kiwi kiwi. Ynne ka sngi da lai yalap u ha Chirinpara, Bandalkona wa ha Kumligaon.
Da kyntu u ya ki paidbah wow kyrchaan ya u kyrtong ka NPP, heiwa da pynche u ya ki paidbah wow kyrchaan ya ka party kawa synchaar ya ka jylla kawa angnood wow wanrah yei kaam pynroi liang wanang.
Heijooh i por da ong u wa ka NPP toh ka party kawa kreh neibynta waroh ki jaitbru khlem pait chilliangkhmat wei ymtoh iwa suk ya ki MLA ka liang pyrchah wow wanrah ya ki kaam pynroi.
“Ki paidbah ka Ampati e ki i chaniah ha u Mukul Sangma hadooh 25 snem tangwa ymye u wow leh yeiwa emkaam wei katni won da ieh u ya ka Constituency,” da ong u Conrad.
U MLA warim ka Songsak Constituency, u Nihim D. Shira da ong u wa u Mukul ymye u wow wanrah ya ka Government College ha Ampati neibhah tieñ u wa lada em ki thaw puræ daw chem chitom u wow yakhun pyrchah ya u kyrtong uwa da biang i stat i tip.
U kyrtong ka NPP, u Clement G. Momin da ong u wa emkaam u husiar ki paidbah wei ymtoh u tieñ ki ya u Mukul Sangma, neibhah ym em de u hei bor. Da ong u wa u Mukul jooh mlien u wow pyntieñ ya kiwa thap vote neibhah wa ha u Thohlakhmi (February) u Mukul da ong u wa lada ym jied ki bru ya ka Congress, waroh ki jait scheme daw pyndam noh ya ki wei ini daw ktah bha i ya ki paidbah. Da ong u leh wa katni u Mukul ymtoh de u Montri Rangbah, ymtoh de u ap wei ymtoh de u tieñ ya oo.
Discussion about this post