I sangeh kit jhep ka Jowai Municipal Board naki yung ki sem yong ka chnong Jowai kattu daki bnai neidaw wym yoh thaw noh jhep, da pynkulmar ko yaki paidbah manda dap i sma i tung haki thlu yung khamtam kitu kiwa sah ha ki yung khian ki wym em ki thaw pynlang yei jhep wa pyut wa ki wym em pyut, kamtæ neini i daw da sakhi yei noh khiar yei jhep ha kylleiñ soodong ka chnong Jowai iwa da nang joor i haki bynta yong ki liar ki chka, ki chariñ yong ki sarok wa kiwi ki thaw.
Hao wym ye u len wa i noh jhep harood sarok da em hi i nadooh ki por wadep, tangwa boon hi toh i khyndaw ki chyiap ki moo wa mih hawa chna yung chna sem, wot hawa neiliang ka chnat PWD kamjooh ki bor District da maham ki deiwa pynyieñ Signboard wei pynkrehkaam ya ki kyndon waphær waphær kam chibynta u yada yaki um ki wah, ki pynthor hali wei u wanrah yei khooid i suba.
Tangwa ha kini ki sngi won da chem wa i noh yei jhep da nang joor i haki soodong sookun wei boon hi i jhep wa li noh ki paidbah toh kiwa mih man-ka-sngi naki yung ki sem, neibhah wa sakhi yei em ki jhep wa mih naki yung chet ja, neitæ ki kot, ki Plastic wa kiwi.
I yoh u sakhi yaki kattu katni ki bynta wa em haki soodong sookun ka chnong Jowai da chem waki dooid ki liar wa kai cha ka wah Myntdu da dap dei jhep, neitæ won leh ki chariñ loom nei joor i noh jhep heiwa ki jhep dapoi ki hadooh tre ka wah Myntdu wei em leh kiwa dang sah ha chiteiñ riat.
Hajrong ini i bynta ki bru waheh wa yoo, da ong ki wa ini da man i maa wa khroo wa yang yaki paidbah wa chong chnong, neibhah mynstep mankawi manda joor u slap da tikna wa waroh kini ki jhep u poi ki cha ka wah Myntu ka wah wa kær soodong yaka chnong Jowai wei psa umbaam umdih leh heijooh i por.
Neitæ wot ki warep wa chaniah naka wah Myntdu haki pynthor hali leh daw chah ktah ki nei wan tymmoh ki jhep, kamjooh i chah ktah ka um.
