Hadien wa ka seiñ Jaiñtia Students Movement–Eastern Region da thoh ko cha u DC ka East Jaiñtia Hills wow pynchna noh ya ka khilon kawa da sahteiñ kawa em ha Tuber Chohchrieh kawa man leh kam ka dak wow pdiang sñiawbha ya kiwa psiah chapoh ka District, ka seiñ da pyntip ko wa chimkhia u DC heiwa i kreh da sdang biang i.
Kani ka khilon toh kawa da chna da ka Star Cement kawa da dep wow wai da u DC warim ka District tangwa da ieh khlem pyndep iwa da jan dap chi snem nadooh wa sdang u chna.
Neiliang u DC ha ka 9 tarik uni u bnai da thoh u cha ka Star Cement hadien wa ha ka 5 tarik ka seiñ da thoh ko cha u DC deiwa maham leh wow sliah ya kani ka khilon lada ym chna pyndep noh ya ka.
