Kam chibynta yong i yakhun pyrchah ya ka khlam u COVID-19 ka Indian Railways da pynkhreh wei da sdang pynemkaam ko ya ki COVID Coaches ha kylleiñ ki jylla ka ri.
Ha ka 20 tarik uni u bnai da booh ya ki 42 ngut kiwa da suba wa em ki ya uni u khñiang ha Mau Junction, Varanasi wei sa 17 ngut won da booh ha ka 21 tarik wei na kini da pynlait noh 8 ngut.
Ka Indian Railways da yaleh ko wow pyndap yeiwa duna ha ki thaw sumaar sorkar deiwa pynkhreh ya ki 5231 tylli ki COVID Care Coaches neibynta ki jylla. Da pynkylla leh ya kini ki daba (Coach) kam ki COVID Care Centre wow sumaar ya kiwa ym em ware u chitom.
Katkam wa man katni ka Indian Railways da booh ko 960 tylli ki COVID Care coach ha ki 5 tylli ki jylla wa kynthup ya ka Delhi, Uttar Pradesh, Andhra Pradesh, Telangana wa Madhya Pradesh.
Na kini ki 960 tylli ki COVID Care Coach, 503 tylli da booh ha Delhi, 20 ha Andhra Pradesh, 60 ha Telangana, 372 ha Uttar Pradesh wa 5 tylli ha Madhya Pradesh.
Katkam ki kyndon ka Ministry of Health and Family Welfare (MoHFW) kini ki sorkar jylla da paan yarap ki na ka Indian Railways wei neiliang ka chnat rel leh da pynbiang ko yeiwa emkaam kini ki jylla.
