Khliehriat: U Deputy Commissioner (Election), East Jaiñtia Hills District da pyntip paidbah u wa ka Election Commission da rai ko wow pynman ya ka Special Summary Revision 2021 hapoh ka District ha waroh ki Polling Station wa da sdang ya ka nadooh ka 16 tarik uni u bnai hadooh ka 15 Kmaichonglad (December), 2020.
Heiyatoh wa ini, kiwon kiwon ki bru kiwa da dap 18 snem i rta, ye ki wow pynpsiah pyrtuid ha ka Electoral Roll deiwa pyndap ya ka Form-6 lyngba ka nvsp.nic.in næ deiwa yachem ya ki Booth Level Officers (BLO) namo ha ki CSC Centre.
Kiwi kiwi ki kaam wa ye u leh wa kynthup ha ka Special Summary Revision 2021 toh wow pyndam pyrtuid yong ki bru kiwa da yut chnong, næ kiwa da khlaad hapoh ka chnong yong ki ha kini ki por lyngba ki ujor ha ka Form-7 lyngba ka nvsp.nic.in namo deiwa yachem ya ki Booth Level Officers (BLO) næ CSC centre.
Chooh chooh wow pynbait ya iwa bakla nadooh ki pyrtuid, kur, rta, wa kiwi kiwi deiwa pyndap ya ka Form- 8 lyngba ka nvsp.nic.in, deiwa yachem ya ki BLO næ ha ki CSC Centre. Ki paidbah ye ki leh wow kyrriah (Transfer) ya i pyrtuid hapoh ka Constituency deiwa pyndap ya ka Form- 8 A lyngba ka nvsp.nic.in næ yachem ya ki Booth Level Officers (BLO) namo CSC Centre.
Da pyntip leh ya ki paidbah wa ka yung krehkaam u Deputy Commissioner (Election), East Jaiñtia Hills District daw phah ko ya ki Booth Level Officer (BLOs) wow wan cha ka chnong yong ki neibynta kini ki kaam.
Katwa kamtæ da kyrpaad ya ki Waheh Chnong wow pynbna paidbah ya ini i kaam wow yarap ya ki Booth Level Officers (BLOs) heipor wa wan ki cha ki Polling Station yong ki neibynta ini i kaam.
