Jowai: Ynne ka sngi, u SP ka WJH u Lakador Syiem hawa yaklam wa kiwa pathai khubor ha kamra krehkaam yong oo da pyntip u wa katkam wa man katni, dang booh hi ya ki bor pulit wow sonteri ya ka Mandir wa em ha Nartiang hadien wa mih i awri awra ha kani ka thaw neidaw wa kajia ki ar liang heiyatoh wa u Pandit.
Katkam ka hukum ka yung bichaar Meghalaya High Court ha ka 16 tarik uni u bnai da ebor ko ya u Oni Muskut Deshmukh wow pyndep ya ka lehniam ha kani ka thaw wei daw chong bichaar biang ko hajrong kani ka kaam ha ka 1 Khonchonglad (Nov) 2018.
Heiyatoh won wa iwa jia ha ka miet yong ka 15 tarik, u Syiem da ong u wa ki pulit da leh ki yeiwa emkaam katkam ka hukum ka yung bichaar ha ka 9 tarik uni u bnai ka wow elaad ya waroh ar ki pandit wow lehniam ki.
Hajrong ki 19 ngut ki pulit wa mynsoo ha ka miet yong ka 15 tarik, da pyntip u wa boon na ki hi da sdang wan kreh biang ki.
Da pyntip u leh wa u Aprilson Marak, uwa man u pulit ka 4MLP uwa da rap mynsoo joor da pynmih ya oo na ICU ka Woodland Hospital Shillong, wei da takha joor u na ka pyllung khmat tidiang wei ye u tip yei man i long u du hadien ka 24 tarik uni u bnai.
Chooh chooh da pyntip u wa ka Assistant Commandant ka SF-10, ka Q. Fancon leh mynstep da sdang biang ko u wan kreh.
Heiyatoh won wa u Addl. SP, u P. Syiem da phah chong (Rest) ki Doctor oo sa kamwa chi tayaw.
Discussion about this post