Da sdang ya ka CM-ELEVATE kawa daw yarap 75% ka bai lutsan ya kiwa kwah u seiñ kreh

Ynne ka sngi man ko ka wow sahparom ya ka Meghalaya heiwa u Montri Rangbah ka jylla, u Conrad K. Sangma, da wai paidbah u ya ka CM-ELEVATE ha Vivanta, Shillong wei kani ka thong krehkaam wa thymme ka sorkar toh wow pynkupbor ya kiwa seiñ kreh wei wow pynku ya i yoh i laa ki khynroo khyllood ka jylla.  

Ha kani ka sngi, u Conrad da man u kam u kongsan hei emlang ki Montri sorkar kam ka Dr. Mazel Ampareen Lyngdoh, u Paul Lyngdoh, u Alexander Laloo Hek wa kiwi ki sahep sorkar.

U Conrad K. Sangma hawa e yei klam da ong u wa emkaam wow pynkupbor ya ki khynroo khyllood ka jylla lyngba kiwa seiñ kreh wei ka CM-ELEVATE daw e laad ko ya 20,000 ngut wow seiñ kreh ha kiwa boon ki bynta ha ki le snem wow wan wei daw pynlut leh hadooh Rs. 300 klur da ka sorkar.

Da ong u wa ka sorkar da kreh ko wa ki Bank wow yarap poisa ya kiwa seiñ kreh heiwa u e yarap 35% hadooh 75% ka poisa wa emkaam yow sdang yei kreh. 

Related posts

Ka sorkar ymtoh kawa ye hi-eh ka KSP wow maham: Sniawbhalang

December 21, 2024

Da u waheh chnong uwa man leh uwa yahkhmat seiñbalang sai kyrtong MDC ka Namdong

December 21, 2024

Hapoh kani ka CM-ELEVATE daw yarap leh wow e da ka ram hadooh 95% na i lut yow seiñ khih wei ya kani ye wow su hapoh 5 hadooh 15 snem wei wow su ya ka ram ha ki 3 hadooh 18 bnai hadien wa chim ya ka ram wei ka sut leh man ko katkam i kreh wa sdang.

Chooh chooh u Conrad da ong u wa ha ki 5 snem wa da lai da ye wow pynmih 3 lak tylli ki kreh wei da sñiaw skem u leh wa ha ki snem wow wan daw ku chooh chooh ini.

“Nga ngait O wa i kam ka sorkar ymtoh du wow chna Policy donhi tangwa emkaam u wanrah ya ka soodong kawa pynchlur ya kiwa seiñ kreh wei ini toh i sdang donhi wei daw pynpliah chooh chooh yeini,” da ong u Conrad.  

U Paul Lyngdoh, uwa man kam u Montri ka chnat Tourism da ong u wa kani ka CM-ELEVATE pynyoo ko yei kitkhia ka sorkar yei mynried ki khynroo khyllood. Wei da yooluti wa 700 ngut u yoh kreh ki lyngba kani wa palat 2000 ngut won u yoh kreh ki na ki le tylli ki Scheme ka chnat Tourism kam ka Green Villa Scheme, Homestay Scheme, Motorhome Meghalaya Scheme waka Prime Tourism Vehicle Scheme.

Ka Dr. Mazel Ampareen Lyngdoh kamwa man kam ka Montri ka chnat i rep i riang da kdaw ko ya ki bynta wa myntoi kani CM-ELEVATE kawa daw ye wow pynkhlan ya i kaam rep hapoh ka jylla. Neibhah kani ka CM-ELEVATE tyrwa ko leh hadooh 50% i yarap poisa wow chna ya ki Polyhouse, wei wow yarap wow thung ya ki jhoor wa ki syntu wa sy’at dor. Kani ka Scheme daw e ko leh ya Subsidy yow chna hadooh 1,000 tylli ki Polyhouse.

U Dr. Vijay Kumar D, IAS da ong u wa ka thong ka CM-ELEVATE toh wow pynmih ya 15 tylli ki Scheme wei wow kyrchaan ya ki 20,000 tylli ki kaam yong kiwa seiñ kreh heiwa da emkaam du Rs. 4,000 yow ye u seiñ kreh heiwa u yarap wow yarap pynduna i lut lyngba ki Subsidy nadooh 35% hadooh 75% kam wow kyrchaan ya kiwa seiñkreh.