Ka Co-ordination Committee of India Bangla Ri War People wa kynthup ya ki bru waheh wasian yong ka thaaiñ War Jaiñtia kiwa im ha khappood wa ka ri Bangladesh wa kynthup leh ya ki Sordar, ki Waheh Chnong kamjooh leh ki seiñbhalang da pynman ki ya ka yalang ynnin ka 11 tarik ha Dawki, ya kawa da pynlai da u Waheh Chnong ka Dawki, u Mankhraw Ryngksai.
Ha ka yalang da pynsñiaw yei mynsien wa khia hajrong ki kaam wa chah thombor ki Khasi Pnar kiwa em ha Bangladesh khamtam hapoh ki kattu katni chnong ka Moulvibazar ka Sylhet Division.
Kam wow kdaw heini ki Khasi Pnar wa em ha kini ki chnong wa em ha ri Bangladesh kiwa im nei rep kwai wa u pathi da chah pam ki tre pathi yong ki wei da chah dat pynmynsoo ki leh du na ki daw wa kwah ki bru Bangladesh wow knieh ya ki thaw yong ki wei ini waroh da wanrah i yei chong syir mynsien ya ki bru ha kini ki chnong.
Kamtæ ha ka yalang, ka Committee da rai ko wow kyntu ya ka sorkar jylla lyngba u Montri Rangbah yong ka wow chimkhia yeini katwa ye wa ka sorkar Bangladesh, khnang wow khang ya kam kini ki kaam chah thombor ha ki por wow wan.
Chooh chooh da rai leh wow sdang ya ka Ad-hoc Committee ka wow tip kam ka Co-ordination Committee of Indo Bangla Riwar People, heiwa u RM Shabong u man u kam u Chairman, u Kmen Myrchiang kam u Vice Chairman, u SS Manners kam u General Secretary, u Matthew Kongwang kam u Assistant Secretary wa u Edmund Khongngai kam u Spokesperson cum Publicity Secretary.
