U Chief Justice ka High Court ka Meghalaya, u Justice Sanjib Banerjee ynnin ka sngi da wai paidbah u ya ka Meghalaya e-Court Fee System deiwa emlang u James P K Sangma, u Montri wa pait ya ka chnat Registration, Taxation & Stamps, Law wa kiwi deiwa sakhi lang kiwa bichaar ka Meghalaya High Court, u Justice H S Thangkhiew wa u Justice W Diengdoh ha ka yalang wa pynman ha High Court ka Meghalaya.
Hawa e yei klam, u Justice Sanjib Banerjee da ong u wa kani toh ka sngi wow sahkynmoo neidaw wa yow yoh yei hok bichaar da pynsuk chibynta. Da kyntu u yei ya krehlang ka Bar Association neibhah ki toh kiwa pynemkaam ya ini awjan man-ka-sngi. Da kyrmen u wa ki dkhot ka Bar daw pynemkaam ki ya kani ka rukom wa thymme katkam wa emkaam ki.
Da pynsñiaw u leh yei sñiawngooh ya ka sorkar yei pteiñ ko wow e yei kyrchaan kamjooh ya ka Stock Holding Corporation of India Limited yei embyntalang ko wow pynemkaam yeini i Digitization ya ka jylla.
Neiliang u James P K Sangma hawa e yei klam da khana u yei rukom krehkaam kani ka e-Court Fee System, deiwa khana bniah yei myntoi deiwa pynemkaam ya kani ka rukom su bai Court Fee lyngba ka stat Digital heithaw wow wan su dei bru.
Kam wow kdaw heini wa ka NCT ka Delhi toh kawa nyngkong dooh ka jylla wa da sdang ya kani ka e-Court Fee Collection System ha u Khonchonglad (Nov) 2012. Ka Meghalaya kattu da man ko ka jylla wa 17 hapoh ka ri wa da leh yeini. I su ya ka e-Court Fee toh deiwa pynemkaam da ka Internet.
Ka e-Court Fee daw pynmyntoi bha ko ya ki paidbah yow pynsmat yei su e-Court Fee wa ye u leh pyn na yung ki.
Ka e-Court Fee daw pynmtoi ko leh ya ka sorkar heiwa daw pyntikna wym liat ka poisa cheiwon cheiwon wei daw pynsuk leh ya ki paidbah ki wym hap de wow pynbiang poisa thij hawa su wei chitom wow yoh poisa biah, wei daw pynduna leh yei pynemkaam ya ki kot neibhah hap du wow khana ya ka e-Court Fee Number ha ki mukotduma, daw pynkyllooid leh ya ka thaw krehkaam, i emkaam bru wa i lut phut hei lai i wan ki paidbah.
