Da sdang ya ka e tika neibynta ki manbei wa ki khynnah kawa tip kam ka District Intensified Mission Indradhanush 4.0

Ka yung krehkaam District Medical & Health Officer, East Khasi Hills District ynne da sdang ki ya ka District Intensified Mission Indradhanush 4.0 ha Community Hall, Sohryngkham Neng, East Khasi Hills deiwa emlang u Pyniaid Sing Syiem, MLA ka thaaiñ kam u kongsan.

Hawa e yei klam, u Pyniaid Sing Syiem da ong u wa ki bei ki pa em ki i bynta wa emkaam bha wow wanrah yei chait i khiah ha ka imlang sahlang wei yow ye u poi cha kani ka thong, ki manbei toh u wan ki chakhmat wow chim kabu yei myntoi wa da e da ka sorkar.

Da ong u wa ki tika wa e cha ki manbei wa ki khynnah toh kiwa emkaam bha yei chait i khiah ka bei wa i khon. Da pynchlur u wow pyndooh noh ya i rukom pyrkhat yong rim wow em i tieñ wa i artatien, i sñiawthooh bakla wa i ngait biej iwa man ki daw wa duna ki bru wa wan chim tika kamjooh wow kha khon ha ki thaw sumaar. Da khut u leh ya kiwa kreh hei chait i khiah wow kreh chitom ki wei wow pynman leh ya ki pynsñiawthooh paidbah yei myntoi wa yoh na ki tika. Da kyntu u leh ya ki dorbar chnong wow ya krehlang ki wa ka chnat i chait i khiah yow yoh yei chaniah ki paidbah.

Ka Dr. P Manners, State Immunization Officer, Meghalaya, da pyntip ko wa ka sorkar India da jied ko ya ki 3 District hapoh ka jylla (East Khasi Hills, East Garo Hills wa West Garo Hills) wow pynman ya ka Intensified Mission Indradhanush 4.0 neidaw wa duna kiwa wan chim tika khamtam ki manbei wa punkhon kamjooh ki khynnah. Da ong ko wa neidaw wa em ka khlam COVID-19 ha kini ki ar snem, ki manbei da artatien ki wow wan chakhmat wow chim tika neibynta ki khon ki neidaw wa tieñ ki wa yabi kjut, kamtæ ka Intensified Mission Indradhanush 4.0 da leh ya ka neibynta kitu ki khynnah ki wym pu em wan chim lut yei tika wa ya ki manbei wa punkhon.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Kani ka Intensified Mission Indradhanush 4.0 toh kawa daw leh le sien itæ nadooh myntu ka 7 tarik kawa neh chi tayaw wei daw leh biang ha ka 7 tarik u Wisu (Mar) kawa daw neh chi tayaw wei daw pynkut ha ka 4 tarik u Naitung kawa daw leh chi tayaw.

Kiwa de kiwa klam toh Dr. A Lyngdoh, DMHO, East Khasi Hills District wa Dr. E L Kharmutee, District Immunization Officer, East Khasi Hills.