Ka seiñ JSU da dawa ko na ka sorkar nadooh u snem 2018 wei da yachem ko leh wa u montri ka chnat Sports wow kynthup lang ya ka Ri-loom Jaiñtia ha ka 39th National Games kawa daw pynman ha ka jylla, wei ynne ka 15 tarik da khut yalang ko ya waroh ki seiñ Sports Association kiwa em ha ki ar District wow yaklam hajrong kani ka kaam.
Ha i yachem da rai wow lai yachem ya u montri rangbah ka jylla, u Conrad Sangma hajrong ini i jooh i kaam.
Ha ka yalang da wan chimbynta da ki seiñ yalehke waphær waphær wa kynthup ya ka West Jaiñtia District Sports Association (WJDSA), East Jaiñtia District Badminton Association (EJDBA), West Jaiñtia District Badminton Association (WJDBA), Laskein Block Sports Association (LBSC), Amlarem Sub Division Sports Association (ASSA) wa kiwa yalehke wa pawnaam ka jylla na Ri-loom Jaiñtia.
Ka yalang da rai leh wow sdang da ka “All Jaiñtia Sports and Games Forum” (AJSGF) ka wow dawa kyrpang wow kynthup ya ka Ri-loom Jaiñtia ha ka 39th National Games.
Kiwa kitkaam ka AJSHF toh u Chairman u Eddie Murphy H Passah, u Vice Chairman u Joshua Sajem, Secretary u Ambrose Gatphoh, Joint Secretary u Wympher Lamare wei da jied ya u President ka JSU u Jesrsom Shylla wa ya u General Secretary ka seiñ u Treiborlang R Suchen kam kiwa ektien neibynta ka Forum.
Chooh chooh kani ka Forum da kyrpaad ko leh ya waroh ki 7 MLA ka ri-loom Jaiñtia wow kyruiñ cha ka thaaiñ wow wanrah ya i roi i paar khnang wa ki khynroo khyllood u yoh myntoi ki ha kiwa boon ki liang wei khamtam ha ki kaam yalehke Sports.
