Ka chnat Arts & Culture, ka sorkar Meghalaya deiwa ya krehlang waka Indian Council For Cultural Relations (ICCR) ynne da sdang ki ya ka Har Ghar Tiranga hapoh ka jylla ha ka yalang wa pynman ha U Soso Tham Auditorium, Shillong heiwa u Montri ka chnat Puræ Puthi, u Lahkmen Rymbui da embynta u kam u kongsan deilang wa u Chief Secretary ka jylla, u D P Wahlang kam u symbood kongsan.
U Lahkmen Rymbui hawa e yei klam da ong u wa ynne toh ka sngi kawa emkaam bha ya i kam ki nong India wei da ban joor u yei kordor ka lama ka ri deiwa ong wa kattu da pyndep yei dap 75 snem i yoh laitlooid ka ri wa kamjooh i dap 50 snem i yoh man kam ka jylla wa pura wei heini i por da yoo u yei maya ki bru ka jylla ya ka lama ka ri kawa da pynhær ha man ki yung ki bru hadooh ha ki kari ki bru.
Da ong u leh wa kiwa chong chnong toh u man ki kiwa sñiaw sarong wow pynhær ya ka lama ka ri wei lyngba kani da kyrmen u wa da thap ya kani ka dak ka ri ha i rukom im i man-ka-sngi.
Neiliang u D P Wahlang hawa e yei klam da ong u wa ini toh kam chibynta ka Azadi ka Amrit Mahotsav yow lehkmen yei dap 75 snem i yoh laitlooid ka ri India. Kani ka Har Ghar Tiranga u neh ko nadooh ka 13 hadooh ka 15 tarik uni u bnai yow sai yei mynsien maya ri wei wow pynsñiawthooh paidbah chaphang ka lama ka ri.
Ha kani ka sngi da chimbynta deilang wa ki khynnah skur na kiwa boon ki skur na Shillong, kiwa chong chnong wa da heh rta wa kiwi kiwi de.
Da emlang leh u F R Kharkongor, Commissioner Arts & Culture, u C V D Diengdoh, Secretary Home, ka I. Laloo, Deputy Commissioner East Khasi Hills, u M Sangma, Director DIPR wa kiwi kiwi de.
