Kam chibynta wow pynchngaaiñ yei lai i wan ki bru ha ki luti ki syngkieñ, da sdang ya ka IRAD (Integrated Road Accident Database) ynne ka sngi da ka Chief Secretary, ka R V Suchiang ha ka yalang wa pynman ha Conference Hall, Main Secretariat, Shillong.
Ka IRAD toh kawa pynemkaam ya ka Internet wa i stat Information Technology (IT) kawa daw yarap ya ki Police, ka Public Works Department (PWD), Health, Highway wa kiwi yow ye u wow thap ha kani heiyatoh wa i chem yong jar jiar i takit yong ki manda em i ya tyrrah kari, nadooh i rukom man u sarok, i rukom man ka kari wa kiwi kiwi, da i thmu wow chemdien yei daw wa jia i ya tyrrah wei iyi wa ye u leh yow duna kam ini i jia.
Kani toh kawa ka yoh poisa na ka World Bank, heiwa ka IRAD em ko hapoh i pait ka Ministry of Road Transport & Highway ka sorkar India wei da pynkrehkaam da ka NICSI wa IIT Madras.
Hawa e yei klam, ka R V Suchiang da ong ko deiwa pyrkhat yei ku kiwa dooh yei mynsien nei tyrrah kari hapoh ka ri, hadooh wa ka Supreme Court leh da phah ko ya waroh ki sorkar jylla wow yaleh u pynduna ya i tyrrah kari. Kamtæ da ong ko wa deiwa wa sdang ya ka IRAD daw yarap bha wow pynduna yei tyrrah kari wei daw chngaaiñ i lai i wan. Da ban joor ko leh yei emkaam wow pynchna pynmiat ya ki thaw wa jooh jia i tyrrah kari wa i mynsoo. Da kdaw ko leh yei emkaam wow bood ya ki kyndon yah kari, deiwa emkaam leh wow pynsñiawthooh paidbah yei rukom yah kari deiwa miat katkam ka kyndon, khamtam kiwa dang khynroo yow sñiawthooh bha ya iwa hap ki wow bood manda yah kari.
U H. Nongpluh, Additional Director General of Police da pyntip u wa hapoh ka jylla da em i ya tyrrah kari man-ka-sngi heiwa kiwa yap da em ki kamwa 180 ngut chi snem. Da kyrmen u leh wa deiwa sdang ya ka IRAD, waroh iwa pynlang wa i yutip wa da yoh daw yarap ko wow yada nei tyrrah kari. Da ban joor u leh yei emkaam ya ki pulit kam kiwa wan nyngkong wow yarap wow lehbha yei kaam yong ki.
Ki SP yong kiwi ki District da chimbynta lang ki lyngba ka Video Conference.
