Shillong: U montri ka chait ka khiah ka jylla, u A.L. Hek, ynne ka sngi da sdang u ya ka Leprosy Case Detection Campaign (LCDC) neibynta ka East Khasi Hills wa Ri Bhoi District ha pchem ka Civil Hospital, Shillong. Ya kani ka yalang da pynman da ka National Leprosy Eradication Programme, Meghalaya.
Kani ka Leprosy Case Detection Campaign namo ka thong wow chem ya kiwa kjut Nianglyngkut toh kawa em hapoh ka National Leprosy Eradication Programme (NLEP). I thong yong kani ka Campaign toh wow chem smat ya ki bru kiwa yoh Nianglyngkut wei wow pynsñiawthooh paidbah leh chaphang ini i jait kjut yow lait kiwa chah ktah u man kiwa tkoh na ini i kjut wei wow yoh sumaar ki heipor wa biang wei kamjooh wow khang yow lait ini i kjut u poor cha kiwi.
U Hek hei klam yong oo da khut u ya waroh kiwa emlang wow man ki kam kiwa rah khubor heiyatoh wa ini i kjut yow man ko kawa jop. Da ong u wa ar tayaw man ko kawa tbian ya kiwa kreh ka chnat i chait i khiah yow ye ki u poi lut cha waroh ki bru kamtæ emkaam i krehlang na ki chnong ki thaw ha waroh ki kyrdan yow ye u pynwiar jait ya ini i kjut Nianglyngkut napoh ka jylla.
Ha ki ktien maitphang wa e da ka Dr. M. Marbaniang, State Leprosy Officer da pyntip ko wa hapoh ka jylla man u snem da em bait 20 hadooh 30 tylli kiwa yoh kjut Nianglyngkut kiwa kyntup ya kiwa yoh kjut thymme wa kiwa em ha i sumaar. Na pyrdi kini, da em kiwa yoh ya i joor ini i kjut wa tip kam ka Grade 11 Disabilities iwa pynyoo wa da chem ya kini ki bru ha i bynta wa da slem yoh ya ini i kjut.
Ha kani ka sngi da saam leh ya ki khusnaam cha ki khynah skur kiwa jop ha ka yakop thoh Essay.
Discussion about this post