Da sdang ya ka Meghalaya Cancer Care

U Montri Rangbah ka jylla, u Conrad K Sangma ynne da sdang u ya ka Meghalaya Cancer Care kawa tip leh kam ka ‘Meg Can Care’ yow chem smat ya kiwa yoh Cancer ha ka yalang wa da pynman ha U Soso Tham Auditorium, Shillong. Ya ini da sdang ka sorkar deiwa ya krehlang waka Appollo Telemedicine Foundation deilang waka World Economic Forum heiwa da emlang leh ka Montri ka chnat i chait i khiah, ka Dr. M Ampareen Lyngdoh.

U Conrad hawa e yei klam da ong u wa ka Meghalaya khamtam ka East Khasi Hills da em ko hei wa ar hapoh ka ri hei boon kiwa yoh Cancer. “Hawa yataoh wa ka Esophagus Cancer wa ktah nadooh na rdang hadooh u kpoh, i yoh i hei nyngkong hei boon dooh kiwa yoh ya kani ka jait Cancer wei deiwa sdang ya kani ka Meg Can Care pynyoo wa ka sorkar chimkhia ko ya ini i chitom, wei kam ka imlang sahlang leh em i ka bynta wa emkaam yow pynduna ya ini i boon kiwa yoh Cancer kamjooh yow yoh kiwa chitom yei chait,” da ong u.

Da pyntip u leh wa ka sorkar pait ko yei chait i khiah u bru deiwa pyrkhat nadooh wa pun hadooh wa tymmen ym du wow pynbiang yei sumaar tangwa wow pynchlur leh wow im deiwa chait wa khiah. Yow leh yeini, ka sorkar da booh bhah ko ka poisa kawa da ku da ar chah hawa nujor wa ki snem wa nachwa.

Kamtæ da ong u wa ka Meg Can Care toh kawa miat bha i kreh wa da sdang da ka chnat i chait i khiah wei hap i wow kynmoo wa i chait i khiah chong i chiboon hei rukom im deiwa pynmyllien da iwa bha nadooh i baam i dih wa i smat wow phah sumaar, wei hajrong ini da pynchlur u ya kiwa chong chnong ka Meghalaya khamtam kiwa na East Khasi Hills wow chimkhia ki yeini neibhah lada smat u chem ya ka Cancer nadooh wa sdang ko, 80% toh kiwa ye u pynchait.

Related posts

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Chooh chooh da pyntip u wa i rukom sylli ki Doctor toh iwa man katkam ka juk wa katni, kamtæ toh u chim kabu ya ini deiwa wan smat chakhmat.

Hachwa ini, u Principal Secretary, ka chnat Health, u Sampat Kumar da pyntip u wa du 16% donhi kiwa yoh Cancer wa tip wa em kani ka thaw wow chah sylli namo ka Screening ya kiwa yoh Cancer wei lada wan smat ki, wei manda chem smat yei Cancer nadooh wa dang sdang i, 80% i por toh iwa ye wow pynchait.

Da khana u leh wa 10% na kiwa yap hapoh ka jylla toh na ki kjut ki wym poor wei kini toh kiwa yoh Cancer.

U Montri Rangbah da pynlait paidbah u leh ya ka Cancer Helpline Number 14410 deiwa khnioñ won ha u 5 yow yaklam chaphang ka Cancer. Da kaweh lama u leh ya ki Cancer Ambassador Cyclist.