U Montri Rangbah ka jylla Meghalaya, u Conrad K. Sangma ynne da wan wai u ya ka “Meghalaya Rafting” ha chnong Umtham, Ri-Bhoi District da ka thong wow pynchlur yei kiñ lieñ wa tip kam i Rafting hapoh ka jylla.
Ha ki snem wa boon nachwa, ka Ri-Bhoi Water Sports & Tourism Cooperative Society deilang waka Meghalaya Canoe Association da kreh ki yow pynku ya ka Rafting hapoh ka chnong Umtham kawa em leh ka wah wa i thaw wa miat bha yow leh ya kani ka rukom kiñ lieñ, kamtæ ka sorkar deiwa tipmit yeini i wei yow pynku ya ini i kaam, da sdang noh ko ya kani ka Meghalaya Rafting.
Ha chnong Umtham da dep pynman boon ki yakob National wa International kiwa pynman da ka Ri-Bhoi Water Sports & Tourism Cooperative Society waka Meghalaya Canoe Association yow pyntipmit ya kani ka jait yalehke, kamtæ ki khon khynroo khyllood kani ka chnong leh da man ki kiaw da pliah wei kiwa da pnah bha ha i leh Rafting wei da dep ki leh wow chimbynta hi ki yakob hapoh ka ri wei kamjooh cha baar ri.
Ka Megha Kayak Fest wa pynman ha Umtham da man ko leh kawa da bna naam hapoh ka pyrthai najrong kani ka chnong em ko hei thaw wa miat bha kamjooh ka um wa biang, da chna leh ya ka rukom hiar ki lieñ cha ka wah, ka luti wa hap bood hawa kiñ lieñ wa kiwi de.
Neiliang u Conrad da kular u wow e yarap ya kini kiwa nyngkong dooh wa sdang ya ka Rafting hapoh ka jylla yow ku ki cha ki kyrdan wa heh wei iwa daw yarap ya ki khynroo khyllood wei yow kyruiñ khmat ki ri ka pyrthai cha kani ka chnong.
Da yooluti u leh wa ki khynroo ka jylla kiwa ka-it wei kiwa em sap ha kani ka jait yalehke daw wanrah burom ki ya ka Meghalaya ha ki por wow wan wei ka sorkar da sdang ko leh yei thooh ya kitu kiwa em yei sap.
Yow pynman ya ka Umtham kam ka thaw uiñke suwari, u Conrad da kular u wow leh smat yow kynthup lang ya ka hapoh ki thaw wa pynchlur ka sorkar wow lai pait kiwa wan uiñke wei daw e yarap leh ya kani ka chnong.
