Jowai: Hajrong ka thong wow yada na ki kjut wa ym yabi namo wa tip leh kam ka Non-Communicable Disease kam ka kjut Cancer, Diabetes, Klongsnaam (Cardiovascular) wa ka Stroke kiwa katkam wa man katni da roi bha ki ha ka ri India, ynne ka sngi deiwa ya krehlang ka chnat i chait i khiah kawa tip kam ka Ayush da wai ya ka chnat Non Communicable Diseases (NCD) ha Jowai Civil Hospital Ialong, West Jaiñtia Hills District, wei ya kani ka yalang da wan wai da ka R. Manner kawa man kam ka ADC yong ka West Jaiñtia Hills District ryngkat i emlang ki Doctor na kani ka chnat.
Kani ka prokram toh kawa da yahkhmat da ka sorkar jylla hapoh ka “National Programme for Prevention and Control of Cancer, Diabetes, Cardiovascular and Stroke” heiwa da chim ya ka bynta wow kreh chirup neibhah wa ki Doctor Ayush le hem ki ka bynta wow yada na kini ki jait kjut.
Ka thong wa kongsan hi toh wow kyntu yei chait i khiah khnang wa kiwa chah ktah u yoh ki yei sumaar heipor wa biang wei wow pynsñiawthooh ya ki wow yakhun pyrchah yei kjut chwa wow dier i por.
Katkam ka bui yong ka World Health Organisation wa da pynsñiaw da ka Dr. R. Pohrmen kawa man kam ka Medical Superintendent yong ka Jowai Civil Hospital, Ialong, da ong ko wa kini ki kjut ktah ki ya kamwa 40 million ngut ki bru man la u snem, wei kamwa 15 million won ki bru man la u snem dooh ki yei mynsien yong ki na kini ki jait kjut kiwa hei rta 30 hadooh 69 snem.
Ha ri India katkam ka yutip wa yoh naka World Health Organisation wa da pynmih ha u snem 2014, i yap ki bru na kani ka NCD da kynjoh i kamwa 60%, wa kynthup ya kiwa yap na ka kjut klongsnaam wa man 26%, na ka Cancer hadooh 7%, Diabetes hadooh 2%, katwa ka Chronic Obstructive Pulmonary won 13% katwa kiwi won man ki kamwa 12%.
Chooh chooh da ong wa ya kani ka “National Programme for Prevention and Control of Cancer, Diabetes, Cardiovascular and Stroke” da sdang paidbah nadooh u snem 2010 ha ki 100 tylli ki District yong ki 21 tylli ki jylla ka ri hajrong ka thong wow pyndooh ya ki kjut ki wym yabi, katwa ha west Jaiñtia Hills won da sdang ha u Naitung (April) 2016 ha ki le tylli ki Centre wa kynthup ha Jowai Civil Hospital, Ialong, Laskeiñ CHC wa Nongtalang CHC.
Discussion about this post