U Deputy Commissioner ka East Jaiñtia Hills District, u A. Baranwal ynne da wai u ya ka Lost to Follow Up (LFU) Tracking/ Tracing Drive ha Video Conference Room ka yung krehkaam u Deputy Commissioner. Ka thong yong kani ka Project toh wow thooh wei wow booddien ya ki bru wa em ya u khñiang kjut HIV khnang wow yoh u sumaar ya ki da ki Antiretroviral Therapy Treatment (ART). Ya kani ka Project daw pynkrehkaam da ka Meghalaya State Network of Positive People (MSNP+).
Neiliang A. Baranwal, da ong u wa em 241 ngut ki bru wa em ya u khñiang kjut HIV hapoh District kiwa da mih na i sumaar ART wei kani ka Project daw pyntikna ko wa waroh ki 241 ngut u wan chim dawai ART biang ki dei langær wei wow test leh ya kiwa hayung hasem, ki kurim wa ya ki khon.
Da ong u “Kani ka Project daw pynsñiawthooh paidbah ko wa deiwa chim ya ki dawai ART ki bru kiwa em ya u HIV daw ye ki wow im kam kiwi tawon ki bru.”
U Deputy Commissioner da ekhublei u leh ya u Project Assistant, AHANA, Assistant Director, Meghalaya Aids Control Society (MACS), wa ka Meghalaya State Network of Positive People (MSNP+) wa da wan ki chaphrang da kani ka Project. Da pyntip u wa ya kani ka Project daw pynlut T. 3.5 Lak hadooh 4 Lak ya kawa da yoh lyngba ka CSR (Corporate Social Responsibility) wei i sumaar ART leh daw yoh pyn ha Khliehriat Civil Hospital.
U Barry L. Kharmalki, Project Assistant, AHANA da pynche u hajrong ka Lost to Follow Up (LFU) Tracking/ Tracing Drive (Finding the Missing Links Project), u man ko neibynta 3 bnai wow thooh ya kini ki 241 ngut ha ka District khnang wow sdang biang ki wow wan chim dawai ART.
Da ong u wa daw em 3 ngut ki bru namo ki Tracer ya kiwa daw chah hikai ha ka MSNP+, khnang wow ye u murieh ya ki pyrtuid kini ki bru wa em ya u khñiang HIV.
Da kyntu leh ya kiwa da sangeh yei chah sumaar ART wei kiwa kwah wow pteiñ biang wow chim dawai ye ki wow yaklam wa u Project Coordinator, u Barry L. Kharmalki lyngba u Number 8732015954 (Heiwa daw murieh ya i pyrtuid yong ki).
