Khliehriat: Ka Intensified Diarrhoea Control Fortnight (IDCF) 2020 da sdang yaka ynne ka sngi ha Sutnga CHC, East Jaiñtia Hills District haka yalang wa pynman daka yung krehkaam u District Medical and Health Officer, East Jaiñtia Hills District.
U Dr. R. Pyrtuh, BDO, Saipung C&RD Block da man u kam u kongsan katwa u Dr. Dominic Shylla, DM &HO, East Jaiñtia Hills District da man u kam u symbood kongsan. I thmu ini toh yow pynduna yei yap ki khynnah neidaw ka kjut pynhiar kpoh.
U kongsan hawa e yei klam da ong u wa i thong toh wow e dawai ORS wa i dawai kuli Zinc neibynta ki khynnah wa em hapoh 5 snem i rta yow yada nei kjut pynhiar. Da pyntip u leh wa ki ASHA kajmjooh leh ki wakreh Anganwadi daw lai psiah ki ha iwi pa iwi i yung wow saam ya kini ki dawai wei da kyntu u yaki bei ki pa wow pyntip cha ki ASHA lane lai cha ki Anganwadi Centres lada yoh pynhiar ki khon ki.
U kongsan da ban joor u yei emkaam wow myllien yei saitkti, u dih yaka um wa khooid, u baam yaki baam wa tei yei doh i pran wei wow man hi leh kiwa lehkhooid yow yada na kani ka kjut. Da kyntu u leh yaki ASHA wa Anganwadi wow pteiñ ki wow e yei chakri wa bha yong ki neibynta ki khynnah wa ki bru ka District.
U Dr. Dominic Shylla, DM&HO, East Jainñia Hills District ha i e yei klam yong oo da kyntu u ya ki paidbah wow ya chimbynta ki ha ki yalang pynsñiawthooh wa pynman daka sorkar naki por cha ki por wei wow pynyoh yaka sumaar wa biang yaki khon yong ki.
Kiwi de kiwa da klam toh ka Dr. (Mrs) R. Toi, M&HO, I/C Sutnga CHC, kawa da khana chaphang ka IDCF, 2020, u Ariston Dhar, DPM, NHM, East Jaiñtia hills District uwa da e yaki ktien pdiang sñiawbha waka Dr.(Mrs) E.L Kharmutee, DIO Officer ka DM&HO, East Jaintia Hills District kawa da e yaki ktien e khublei.
Ha kani ka yalang da saam leh yaki yusong ORS cha ki bei ki pa wa emlang wei da pynman leh yaka dih dawai.
