Ka thong krehkaam ka chnat i chait i khiah kawa da e pyrtuid Social Awareness and Action to Neutralize Pneumonia Successfully (SAANS) da sdang ya ka ha West Jaiñtia Hills District da u Dr. KC Ajar, District Medical & Health Officer, ha ka yalang wa man ha Jowai Urban Primary Health Centre, (UPHC) wa em ha Lumkyrwiang kawa da pynman da ka National Health Mission, West Jaiñtia Hills District ynne ka sngi.
U Dr. KC Ajar hawa e yei klam da khana u ya ki dak ki chin yong i kjut Pneumonia iwa ktah ya ki snier heiwa da kyntu u ya ki manbei manpa wow pait ya ki dak kam i thut wow riñ mynsien, ky’oh, iñ-doh wa kiwi kiwi wei emkaam wow yah ya ki khynnah wut-wut cha ki thaw sumaar khnang wow ye u yada ya ki.
Ka Dr. M. Syngkon, District Maternal & Child Health Officer kawa man leh kam ka District Immunisation Officer da ong ko wa ka SAANS Campaign toh ka wow yada ya ki khynnah nei yap na i kjut Pneumonia wa Diarrhoea (pynhiar) heiwa ka thong toh neibynta kiwa 0-5 snem.
Da ban ko leh hajrong ki le bynta kani ka thong kiwa kynthup wow yada, wow yait wei wow sumaar ha i por wa biang ya ki khynnah yow lait nei dooh yei mynsien.
Ya ka yalang ynne da pynlai da ka Additional DMHO, Dr. A. Challam, katwa ka Dr. R. Passah, In-charge ka UPHC da e ko ya ki kyntien khublei.
