U MLA ka Jowai, u Wailadmiki Shylla da wan wai u ya ka SAANS (Social Awareness and Action to Neutralise Pneumonia Successfully) Campaign hapoh ka West Jaiñtia Hills District ha ka yalang wa pynman ha Yungwalieh ka Dorbar Chnong Panaliar, Jowai ynnin ka sngi heiwa ya ka yalang da pynman da ka yung krehkaam u District Medical & Health Officer, Jowai deiwa emlang u Deputy Commissioner, u B.S. Sohliya, u Additional Deputy Commissioner, u M A Challam, ki Doctor naka yung krehkaam u DM&HO, Jowai wa kiwi de.
Ka SAANS toh kawa da sdang yow chem smat ya kiwa yoh kjut hiaw (Pneumonia) kiwa em hei rta wa 0-5 snem.
Neiliang u Wailadmiki hawa e yei klam da pynsñiaw u yei sñiawngooh ya ki Doctor wa ka chnat i chait i khiah wa da pynman ki ya kani ka yalang wa emkaam khamtam ki manbei yow tip ki wow chem smat lada em ki khon kiwa yoh ya ini i kjut heiwa da chem wa ki khynnah wa chah ktah toh kiwa ym em biang i baam. Kamtæ da ban joor u yei emkaam wow baam da ki baam wa biang yow lait leh nei yoh ya iwon iwon i kjut.
Da pynsñiaw u leh yei sñiawsih wa em boon ki bru wym tip ki yei yarap wa e da ka sorkar heiyatoh wa i chait i khiah wei dang em leh kiwa artatien. Kamtæ da kyntu u ya ki paidbah wow chim kabu ya ki Scheme yarap ka sorkar deiwa kyntu leh ya kiwa kreh ka chnat wow lai pynsñiawthooh paidbah.
Neiliang Dr. E. War, Medical Superintendent, MCH Hospital, Panaliar, Jowai da klam chaphang ki dak ki chin wa kammon u tip ki bei ki pa lada yoh i khon ya ini i kjut kam hawa ym bien ki khon u baam, wa khlan prai, i rakhoh, i swe, i iñdoh wei toh u pyntip ki wut wut cha ki thaw sumaar.
Ki thong kani ka SAANS toh leh wow pynsñiawthooh kammon wow yada na ini i kjut, i sumaar, wow chem ya kiwa chah ktah kiwa em hapoh 5 snem, u pyntikna wa waroh ki khynnah u yoh ki yei tika wa le sien yong i Pneumococcal Conjugate Vaccine (PCV) iwa nyngkong hadien 6 tayaw wa hadien 14 tayaw wei sa chisien heipor wa em 9 bnai.
Kani ka SAANS Campaign toh kawa daw pteiñ hadooh ka 28-02-23 hapoh ka jylla.
