Khliehriat: Kam chibynta yong ka tayaw lehwarom Pension Week, u Deputy Commissioner, East Jaiñtia Hills District, u F.M. Dopth da sdang u ya ka Pradhan Mantri Shram Yogi Maan-dhan (PM-SYM) Pension Scheme ynne ka sngi ha DC Conference Hall.
Ha kani ka sngi da emlang leh u Additional Deputy Commissioner, ka District, u S.S. Syiemlieh uwa da pynlai ya ka yalang, u S. Marwein, EAC, ka District, u W. Phawa, District Labour Inspector, u D. Rymbai, Labour Inspector Khliehriat Block.
U Dopth hawa klam da ong u wa ka Pradhan Mantri Shram Yogi Maan-dhan Pension Scheme wa sdang da ka sorkar pyrdi toh wow pynku ya i rukom im ki bru ha kam ki khih mylla yow yoh bai baam tymmen ki hadien wa dap 60 snem i rta.
Heiyatoh wa i pynpsiah pyrtuid da pyntip u wa yeini ye u leh Online wei wa u Aadhaar Card man u uwa emkaam katwa kamtæ da kyntu u wow pynpsiah pyrtuid noh ha u Aadhaar Card khnang wow yoh myntoi na kani ka Scheme.
Ha kani ka yalang da pynyoo leh ya ka Live Video yei klam u Union Minister of State for Labour and Employment, u Santosh Kumar Ganwar wa sdang u ya ka Pension Week 2019 wei hadien ini u S. Marwein da batai u hajrong i klam uni u montri.
Da pyntip u leh wa ka chnong wa boon dooh wa yaleh ya kani ka Scheme daw chah pynkup burom ko ha ka sorkar.
Neiliang u W. Phawa, District Labour Inspector da ong u wa kiwa ye u yoh myntoi na kani ka Scheme toh kiwa kamai hapoh T. 15,000 chi bnai wei na kani ka Pradhan Mantri Shram Yogi Maan-dhan daw yoh ki ya ka bai baam tymmen kawa T. 3,000 chi bnai hadien wa kynjoh ki 60 snem.
Da khana yillu u leh ya ki kyndon ka Pradhan Mantri Shram Yogi Maan-dhan Pension Scheme wa ka National Pension Scheme for Traders and Self Employed Persons deiwa pyntip wa i thap pyrtuid ha ka PM-SYM Pension Scheme toh lyngba ki Common Service Centres (CSCs) ha jar jiar ki chnong yong ki.
Hadien ka yalang da pynman ya ka Mega Enrolment ha DC Conference Hall.
Discussion about this post