Ka Shillong My Passion (SMP) Program kawa da sdang da ka Deputy Commissioner, East Khasi Hills District hajrong ka phang “All about Waste Management” da wai ya ka ynnin ka sngi ha ka yalang wa pynman ha Conference Room ka DC, ka I. Laloo kawa da pynbna yei sdang ya kani ka Shillong My Passion.
Ka DC da ong ko wa kani ka Shillong My Passion toh neibynta uwi pa uwi uwa chong chnong ka sor Shillong wei da sdang ya kani da i thmu wow wanrah yei kitkhlieh yow pynman ya ka Shillong kawa khooid.
Da khana ko wa neidaw wa wan ka khlma COVID-19 da sangeh ya kani ka SMP tangwa ha uni u snem uwa man leh i dap 50 snem ka jylla da pynim biang ya ka kamjooh neibynta ki snem wow wan. Da yaroh ko leh ya waroh kiwa embynta wow ya krehlang neibynta ini.
Ka DC ha kani ka yalang da pynlait ko leh ya ka Episode 1 ki Video wa da chna kam chibynta ka SMP kawa da chna deiwa khana yei parom ka Iainehskhem SHG wa kreh ha Marten, Shillong yow pynkylla sboh yei jhep.
Da pynbood leh yei sdang ya ki le jait ki kaam hapoh ka SMP kiwa man leh kam ki yakob kitæ ka Best out of Waste Project; Reduce, Reuse, Recycle waka Clean Pitch Challenge. Kini toh kiwa da booh da chna kyrpang yow chimbynta ki khynroo khamtam kiwa dang lai College deiwa sdang ya ki Club ha ki College wei deiwa wanrah ya ki buit kiwa thymme heiyatoh wa i rukom pynlang yei jhep kiwa daw pynpoor lyngba ki rynsan Social Media.
Ya ka Clean Pitch Challenge (18-35 snem) kiwa man kam kiwa dang lai puræ, ki bru samen ye ki wow lai thap pyrtuid hapoh ka Website ka SMP Website https://shillongmypassion.in/ yow khana ki yei buit yong ki wei kiwa chah jied daw ye ki wow pynyoo wei pynche hakhmat ki bru wa chemphang (Panel of Experts) wei kiwa chah jied daw pyrchang yei buit yong ki deiwa khian chwa.
Ha kani ka sngi da yoh leh yei klam na ki bru ka Meghalaya State Pollution Control Board (MSPCB), Operation Clean-Up (OCU), Helping Young People Entertainment (HYPE) wa kiwi.
