U montri rangbah ka jylla, u Conrad K Sangma ynne da wai u ya ka Integrated Web Portal namo ka website wa kyrpang yong ka Meghalaya State Public Services Delivery Commission ha Yojana Bhawan hei emlang u Commissioner, Chief Commissioner of Meghalaya State Public Services, u M S Rao wa u State Informatics Officer, u T Dkhar.
Hawa e yei klam u Conrad, da ong u wa ka sorkar jylla da chim ko chiboon ki luti wow pynsuk ya ki paidbah heiyatoh wa i chakri ya ki da ki chnat waphær waphær.
Da ong u wa boonsien i chakri wa paka ha i por wa biang lai i chawi neidaw wa hap bood ya ki kyndon wei da mylliñ noh ya ki paidbah.
Chooh chooh da ong u wa kani ka Integrated Web Portal toh kawi na ki bynta wow pynjanai wei wow wanrah ya i yajan hapyrdi i chakri wa ki paidbah. Da ong u leh wa em hadooh 188 tylli ki jait kaam wa toh u e chakri smat lyngba kani ka portal deiwa kyntu ya ki chnat wow kreh smat ki yei kaam hapoh i por wa tbian.
Kam wow kdaw heini ka Meghalaya Right to Public Services Act 2020 toh ka aiñ wow e chakri ya ki paidbah ka jylla hapoh i por wa tbian wei wow pynchitom ya kiwa kreh lada tlot i kreh ki.
Lyngba kani ka website daw em leh ki sahep wa ka Commission wow booddien din-pa-din yei kreh hajrong ki kaam wa da ujor wei ye leh wow pynemkaam ya ka deiwa suk lyngba ki mobile kamjooh leh lyngba ki Common Service Center.
Ye wow yoh myntoi na ka deiwa lai ha ka http://mspsdc.meghalaya.gov.in.
