Ka Northeast Frontier Railway (NFR) ynne ka sngi da sdang ko ya ki Vistadome Tourist Special Trains ha Assam wa West Bengal yow pynku ya ki kaam uiñke suwari hapoh ka thaaiñ Northeast.
Ya kawa nyngkong dooh kam kani ka rel ha Assam toh kawa lai na Guwahati cha New Haflong wei da wan wow kaweh lama ya ka da u Assam Tourism Minister, u Bimal Bora hei emlang ka Queen Oja, MP u CEM ka NCHAC, u Debolal Gorlosa, u NFR GM u Anshul Gupta wa ki heh ka chnat Railway deilang wa ki heh sorkar.
Ha West Bengal, u Union Minister of State, Minority Affairs u John Barla da kaweh lama u ya kani ka rel wa lai na New Jalpaiguri cha Alipurduar Junction.
Kani ka rel wa lai na Guwahati-New Haflong toh kawa em ya ki Vistadome Coach kiwa em ki yit wa heh yow suk ki bru wow chynna cha lait wei em ko ar tylli ki Air-conditioned Chair Cars wa artylli ki Non-A/C Chair Cars, kawa lai arsien chi tayaw ha ka sngi Wednesday wa Saturday.
Kani ka rel toh kawa lai luti wa jrong 269 Km lyngba ka North Cachar Hills, u sdang ko yei lai luti heipor 6:35 i step na Guwahati and wei daw poi ko ha New Haflong heipor 11:55 i pyrdi sngi. Daw sangeh ko ha Manderdisa wa Maibong Station.
Manda liwan u mih ko na New Haflong heipor 5:00 waje i janmiet wei u poi ko ha Guwahati heipor 10:45 i miet.
Ka rel won wa lai na New Jalpaiguri (NJP) cha Alipurduar Junction daw lai luti ko na Dooars ha North Bengal deiwa kit 44 ngut ki bru deiwa lai 3 sngi chi tayaw kitæ ha ka Friday, Saturday wa Sunday. U mih ko na New Jalpaigur heipor 7:20 i step wei daw poi ko ha Alipurduar Junction heipor 1:00 waje i sngi deiwa lai luti iwa jrong 169 Km.
Heipor wa liwan, ka rel daw mih ko na Alipurduar Junction heipor 2:00 waje i sngi wei daw poi ko ha New Jalpaiguri heipor 7:00 waje i miet.
