Ka Behdieñkhlam ka Seiñ Raij Mukhla da sdang ya ka ynne ka sngi deiwa bood ya ki kyndon yong ka sorkar lyngba ka chnat i chait i khiah deiwa leh yaka Social Distancing kamjooh deiwa deiñ ya ki Mask.
Ya kani ka Behdieñkhlam da sdang ya ka da ka yalang ki Waheh Sankur, ryngkat ki khon ka Seiñ Raij Mukhla, da pynlai ya kani ka yalang da u Langdoh Niam ka Raij Mukhla deilang i e yumut lang ki Waheh Sankur.
Ka phang wa yaklam ha kani ka yalang toh wow jied bru næ ki dkhot na ki dong waphær waphær mar 2 ngut neibynta wow pam ya ki Dieñkhlam (Khnong Blai), artylli ha Mukhla Nongrim wa uwi ha Umlanshor Mukhla na khloo ha ka 23 tarik wei yow wanrah ya ki ha Madan Tihkyndaw wa ha Madan Slot Masi khnang wow yoh u pynyieñ ya ki ha ka sngi wa bood katæ ha ka 24 tarik.
Ha chwa wow jied ya kini ki rangbah, da yoh leh ya i sneiñ i kroo na ki Waheh Sankur kitæ na u Sangot, Waheh Langdog, Waheh Suna, Waheh Sari, u Maji Niam, u Chutia, Waheh Khrong 3 yung wa khaddooh da yoh ya ki kyntien snieñ kyntien kroo na u Wailadmiki Shylla, MLA Jowai Constituency uwa man leh u khon ka Seiñ Raij Mukhla.
