Ka Skill Meghalaya wada wanrah daka Meghalaya State Skill Development Society hajrong ka yurim u e sikai waphær waphær dei mynkna ya ki khon khynroo khyllood khnang yow ye ki wow yieñ hei yong ki hi kjat deiwa seiñ khih seiñ kreh, ynne ka sngi da sdang sa kawi ka bynta e sikai hajrong ka Electrical Domestic Solution wa Plumbing General ha Bosco Pnar Multi-Purpose Vocational Training Centre wa em ha Jowai.
Ha kani ka sngi sdang da wan wai da u MDC ka Jowai North u Brightstar Chyrmang, chirup i emlang u Fr. Francisco Dhar uwa pait ya ka Bosco Pnar, u Lambormi Suchen, Skill Development Officer ka Meghalaya State Skill Development Society wa kiwi.
U Lambormi Suchen hawa klam da e yaroh u yaka sorkar jylla hajrong i wanrah ko yaka Skill Meghalaya kawa ye u e yarap yaki khon khynroo khyllood khlem da yooluti ware yei khih sorkar neibhah man iwa eh u yoh kreh sorkar ha kini ki sngi.
Heijooh i por kyntu haroh u ya kiwa chimbynta wow man kiwa pynlai yumut neibynta i myntoi yong ki hi.
Neiliang u kongsan, u Brightstar Chyrmang da ong u i wanrah ka sorkar ya ki e sikai toh wa i tip i stat da ku ko weiwa i boon bru leh da ku, katwa u pynyoh kreh sorkar won ya waroh ym ye de.
Ong haroh u wa i tip i stat ha kini ki sngi wym mut de du kat u yoh kreh sorkar, tangwa u yarap haroh i hei im wa man-ka-sngi kamjooh leh hawa kreh ya kawon kawon ka kaam.
Kamtæ kyntu u wow chim ya kani ka kabu wada wanrah da ka sorkar neibynta i miat i bha yong ki hi, wym wow pynlut por du hei yang wei yooluti yei kreh sorkar ya boi manda palat i por wymtip de u leh iyi iyi.
U Director ka Bosco Pnar, u Fr. Francisco Dhar da pyntip u wa i e sikai ha ka Electrical Domestic Solution u man i 350 kynta katwa ha ka Plumbing General u man ko 410 kynta kiwa daw pyndep ha ki 3 bnai.
Kiwa yoh myntoi na ini da em ki 100 ngut na Ri-loom Jaiñtia.
