Da sdang yaka e sikai soor sula wa mynkna ha Jowai

Hajrong ka thong u thooh ki laad wow yoh khih yoh kreh ki khon khynroo khyllood kyrpang ya kiwa sah ha Jowai kiwa haap leh hapoh ka Jowai Municipal Board, ynne ka sngi da wai ya ka chlem e sikai soor khlem i su ha North East Institute Of Professional Studies kawa em ha Mynthong Pohkseh Jowai heiwa da emlang u MLA ka Jowai Constituency u Wailadmiki Shylla.

Ya kani ka chlem e sikai da yoh yarap poisa na ka Meghalaya State Skill Development Society chirup i yakrehlang ka Jowai Municipal Board heiwa ya ki khynnah wa pyndep yei chah hikai daw pynyoh leh ya ki kor soor wa kiwi ki tiar wa emkaam khnang wa manda dep ki neini i hikai u man leh ka laad kamai yaki.

U Michael Thongni, CEO & MD NeIPS hawa klam yahkhmat da batai u heiyatoh wa ka North East Institute Of Professional Studies kawa sdang hajrong ka yurim wow wailaad yaki khynroo khyllood u sdang ki yei kreh khamtam ha kini ki sngi wa duna i khih sorkar.

U Lambormi Suchen SDO, Meghalaya State Skill Development Society (MSSDS), Jowai da khana u wa hei sakhiat da boon ki thaw wa dadep wai kam kani ka thaw e sikai ha ki Block waphær waphær tang i wow mang kyrpang du kat ya ka Jowai donhi kani dang man i sien kawa nyngkong.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Kamtæ yooluti u wa hadien wa dep chah hikai waroh u sdang seiñ ki yei khih i kreh wei wow pynmih poisa.

Neilang ka D.V. Lyngdoh, MCS CEO, Jowai Municipal Board won da batai ko heiyatoh i myntoi wa ye u yoh ki khynroo khyllood, ki manbei lyngba ka Deendayal Antyodaya Yojana-National Urban Livelihoods Mission (DAY-NULM) lyngba ka JMB neibynta u seiñ khih seiñ kreh wei kani toh kyrpang ya ki bru wa chong wa sah hapoh ka chnong Jowai kiwa haap leh hapoh ka Jowai Municipal Board.

U kongsan yong kani ka sngi, u Wailadmiki Shylla hawa klam da kyntu u ya kiwa chah jied u yoh yei sikai wow kreh chitom ki lym kamtæ daw man kylla ki kiwa pynsepai donhi yei por kiwi tawon kiwa em sakhiat i angnood wow yoh ya kani ka laad neibynta u im ja ki.

Heijooh i por ong u wa najrong wa em ya ka sap kyntu u leh wow pynpliah ka wei wow pait leh yaka yaaw ka haat wa kiwi wa emkaam heiyatoh u man ko ka laad khih wow im ja.

Ya ka yalang ha kani ka sngi da pynlai da u Raj Passah, Centre In-charge NeIPS Jowai, hei emlang u waheh chnong Mynthong, u L Pohktai wa kiwi kiwi.