Yow yada yaki khonboo nei kjut Pneumococcal Pneumonia kawa wanrah i dooh noh yei mynsien ki khonboo kamwa 1.2 Million ngut man u snem, neiliang ka sorkar ha kani ka kynti da ye ko u pynyoh chaki paidbah ka jylla yaka tika wa tip kam ka Pnemonia Conjugate Vaccine (PCV) kawa haap hapoh ka Universal Immunization Programme, heiwa nachwa ye u yoh du haki thaw e sumaar yong ki bru samen (Private).
Ha West Jaiñtia Hills District ya ini i tika da sdang ynne ka sngi ha Jowai Urban Primary Health Centre (UPHC), wei da pynlait paidbah daka Dr. E. Challam Additional DM&HO West Jaiñtia Hills, hei emlang u DM&HO ka District u Dr. K.C. Ajar, ka District Immunization Programme Officer Dr. M. Syngkon, ka Dr. R. Passah In-charge UPHC, ki manbei wa wan e tika yaki khonboo wa kiwi kiwi de.
Katkam ki kyntien yahkhmat na ka Dr. M. Syngkon da ong wa ya ini i tika da pynlait paidbah nyngkong ha ri America ha u snem 2000, katwa ha ri India won ha u snem 2017 wei da ye u pynkrehkaam du haki 5 tylli ki jylla yong ka ri.
Hapoh ka jylla Meghalaya nadooh u snem 2017 da ye u yoh ya ini i tika du haki thaw sumaar yong samen (Private), neidaw wa i dor toh iwa syad nadooh T. 3000 hadooh T. 4,000 chisien e, wei neibynta u pyndep ya waroh le sien u e, da hap lut hadooh T. 12,000, kamtæ neidaw wa ini i tika man i iaw syad dor tam na waroh ki jait tika yong ka sorkar, da chimpor yaka sorkar wow pynpoi cha waroh ki jylla, ong ka Dr. Syngkon.
Yaka tika wa nyngkong ye u sdang ha ki khonboo wa da kynjoh 6 tayaw i rta deiwa e lang chirup kiwi tawon ki tika, yaka sien wa ar namo ka 2nd Dose u e hadien 14 tayaw katwa yaka 3rd Dose won hadien wada khynjoh ki 9 bnai i rta.
Ka Dr. Syngkon da pynche haroh ko yei man i long ki khonboo ki wym hoi u e ya ini i tika.
U DM&HO ka District West Jaintia u Dr. K.C. Ajar da kyntu u ya ki manbei wow wan e tika ya ki khon ha kini ki sngi wei wow rah ki ya kani ka wyrta cha kiwi won ki manbei neibynta u yoh ki laad yada.
Da ong u i daw wa pynman ya ki khonboo u yap na kani ka kjut toh wa ki bei wa pait wa sumaar wym tip ki ya ki dak ki chin, tangwa nyngkong hi ong u toh u pait yei rukom khih i rupai wei lada toh iwa smat kamjooh i riñ mynsien wa palat yaka 60 sien haka chi minit ki khonboo wa em nadooh 2 bnai hadooh 1 snem toh u suba wa ye ki u yoh yeini i kjut, kamtæ emkaam u smat yah chaki thaw sumaar.
Hawa pynlait paidbah ya kani ka tika, ka Dr. E. Challam da ong ko wa katwon dap dei sñiawkmen wa ka sorkar da ye ko u pynpoi ya kani ka tika cha waroh ki thaw sumaar, wei yooluti ko leh wa ki manbei u rah ki yaki khon yong ki kiwa da kynjoh 6 tayaw i rta chaki Health Centre waphær waphær neibynta u e tika.
