Kam chibynta wow pynkrehkaam yaka One Nation One Ration Card hapoh ka ri waka jylla kamjooh, yow pynemkaam du kawi ka card rachon hapoh ka ri iwa mut wa lada kyrriah chnong kamjooh wa mih lai sah cha kiwi jylla, yei hok u yoh u yaki baam rachon ym dooh ki.
Yow pyntikna wa waroh kiwa em yaki card rachon kiwa yoh myntoi kiwa em hapoh ka NFSA wym dooh ki yei hok yong ki, da emkaam wow yaleh ki ya u Aadhaar Number yow pynyabi waka rachon card.
Kamtæ yow ye u leh ya ini, neiliang ka DC ka East Khasi Hills da pynman ko yei thap pyrtuid Aadhaar kawa da sdang nadooh ka 24 tarik uni u bnai hadooh ka 27 tarik uni hi u bnai neibynta waroh kiwa em card rachon.
Ya i chondur Aadhaar da leh ha ki thaw wa da pynkhreh chipor nalor ki thaw kiwa da em chwa wei da leh ya ini ha ki Community Hall ka Cantonment Area, ha Jaiaw Lansonalane, Laitumkhrah Lumsohra wa Nongkynrih, ha ki yung Dorbar ka Nongrimmaw, Laitumkhrah, ha Laban da pynman ha Dorbar Hall Laban/Assam Club, ha Bishnupur ha i dukan Fair Price Shop wa ha Bishnupur Co-operative Store, Bishnupur.
Ya kini ki thaw leh Aadhaar daw lai rah leh chwa waroh ki chnong ki thaw, kamtæ neiliang ka DC da pynchlur ko ya waroh kiwa em card rachon kamjooh leh ya kiwa chong chnong wow wan ki chakhmat yow leh Aadhaar.
