Jowai: Haka yalang paidbah kawa khut pynman da ki kattu katni ngut wa em i bah khlieh yaka jaitbru khamtam wa yatoh wa ki kaam khajia pood hapyrdi ka jylla Assam wa ka Meghalaya wa da jia na i por cha ki por, da chim yaka rai wow chna da ka Hynniewtrep Border Dispute Redressal Forum (HBDRF) kawa man ka seiñ ka wow lai luti kyrpang hajrong ka kaam khajia pood wa i wym bait u pood u ang.
Ya katai ka yalang da pynman ha kani ka 24 tarik ha Yungwalieh ka Tpep-Pale, Jowai wei hadien wa da dep chna yaka HBDRF da rai wow thooh chwa yaki kot ki sla, ki sakhi sabut wa biang heiyatoh wa ka kaam pood hapyrdi ka Meghalaya wa Assam, nalor wow lai yachem wa u CEM ka JHADC wa KHADC, ki Dolloi, ki bru wa da heh neibynta wow yoh chwa yaki yutip wa bniah.
Kiwa e yei klam ha katai ka yalang da ong ki wa kani ka kaam toh kawa da sahteiñ da slem bha, ka luti wa u lai ki toh wow thooh yaki kot ki sla wa biang, ki sakhi satar wa biang bha yow ye u pynskem ya i mantre yaki thaw wa haap hapoh i khajia wa ka jylla Assam.
Heiyatoh won wa i sahdien ki chnong wa haap haki thaaiñ khappood da pynbaad ki wa hawa wan kawon kawon ka kaam pynroi na ka sorkar Meghalaya da wan pyrchah ka sorkar Assam, hawa wan won na ka sorkar Assam pyrchah sa ka Meghalaya, hawa kamni kiyi wa maad yei chitom wei man ko du kitu wa sah haki thaw khappood.
Kiwa kitkaam yong ka HBDRF kynthup ya u Spoke Person, Advocate u Fivestar Son Suiam, Assistant Spoke Person, Thomas Passah, Chairman Chandametre Sungoh, Secretary ka Purity Phawa, Finance Secretary u Damechwa Syrti deilang wa 30 ngut ki Executive Member.
Discussion about this post