U DC ka West Khasi Hills District da pyntip wa neidaw wa suba wa em ki sñiang wa yap ha chnong Tiehsaw wa suba neidaw i kjut African Swine Fever, kamtæ da pynkrehkaam ya ka Section 144 CrPC wei da pynbna ya kani ka thaw kam ka Surveillance Zone.
Ya ka chnong Tiehsaw da kheiñ kam ka thaw wa sdang namo ka Epicentre ini i kjut ha ki bynta wa em 1 Km na kani ka chnong wei ki thaw wa em hapoh 10 Km won u kheiñ kam ki Surveillance Zone.
Ha kini ki thaw da khang wow sai ya ki sñiang kamjooh ki baam, ki tiar ki tar wa kamjooh leh ki dawai yong ki sñiang wa em hapoh kini ki thaw yow kit cha baar kini ki thaw.
Da khang leh wow psiah ki bru chapoh kini ki thaw ri sñiang wei kiwa pait wa sumaar ya kini ki sñiang ymtoh u lai ki na kawi ka phylloh sñiang cha kawi won.
Ki kari wa mih na kini ki thaw u chah du hadien wa da dep pynkhooid ki.
Ya ki sñiang wa yap toh u tyllep ki wei u tymmoh ki da u chuni. Ymtoh u noh ki kat chawa yoh kam cha ki um ki wah lane cha ki nala.
Ha ki thaw won wym em i chah ktah, ki tre sñiang toh u man ki kiwa lehkhooid wei ymtoh wow chah u psiah ki bru cha ki thaw wa ri sñiang kamjooh wow kset bha ya ki sñiang ki yow lait ki wow mih u lai.
