Hadooh ynnin ka sngi hapoh ka ri India da dep wow e tika la 99,85,38,075 sien heiwa da e 48,08,665 sien, kamtæ ynne i step da poi sa cha uwi u moomær hei e tika deiwa tam 100 klur sien iwa man leh 1 Billion sien wa da dep e tika.
Du hadooh ynne i step da dep wow e tika palat 14 lak sien iwa da pynpoi cha ka 100 klur sien wei daw ku chooh chooh katwa dang lai ka sngi heiwa i e tika toh iwa dang pteiñ.
Kam wow pynkynmoo wa yei e tika da sdang nadooh u bnai wa nyngkong uni u snem deiwa e tika nyngkong chwa ya kitu kiwa em hakhmat dooh wow yaleh pyrchah heiwa neiliang ka sorkar da ong wa ini i e tika ha India toh iwa heh dooh hapoh pyrthai.
Neiliang u Montri Rangbahdooh ka ri, u Narendra Modi da e khublei u ya ki Doctor, ki Nurse wa waroh kiwa da emkti wow pynpoi cha ka 100 klur sien i e tika deiwa ong wa da ini, ka ri India da chna ko yei parom wei da sakhi yei mynsien ya krehlang, i chemphang wa i stat ki 130 klur ngut kiwa chong chnong ka ri.
Ha iwi won i liang, kiwa dang yoh COVID-19 ha India ha kini ki 24 kynta da em ki 18,454 ngut, kiwa dang chait 17,561 ngut wa 160 ngut kiwa yap iwa mut wa kiwa dang chah ktah da ku ki da 733 ngut.
Kiwa dang chah ktah da em ki 0.52% kiwa em 1,78,831 ngut, kiwa da chait 98.15% kiwa em 3,34,95,808 ngut wa kiwa yap 1.33% kiwa em 4,52,811 ngut.
