I dor Premium Petrol da tam i T. 100 ha ki le tylli ki District ka Rajasthan hadien wa i phiang ha ki yaw pyrthai da poi i USD 61 chi tadong (Barrel) ha i sien nyngkong hadein palat chi snem neidaw wa da ku biang i pynemkaam phniang nadooh wa yoh yei dawai yada COVID-19 iwa da pynku dor phniang chawa palat.
I dor i Premium Petrol da tam i T. 100 ha ki 3 tylli ki District ka Rajasthan ynne ka sngi Bibar hadien wa ku dor man-ka-sngi la 6 sngi iwa daw ktah yaki phaw lak ngut heiwa daw ye u ku dor ki jhoor wa kiwi ki mar wa hap wow dai smat namo ki Fast Moving Consumer Goods (FMCG).
I dor Premium Petrol da poi i T. 102.07 chi liter ha Sri Ganganagar District iwa syad dooh na waroh ki District iwa pynbood sa ha Hanumangarh T. 101.42, Bikaner T. 100.24 wa ha Barmer T. 99.43. Ha nongbah ka jylla ka Jaipur, i dor Premium Petrol toh T. 97.95.
Ka sorkar Rajasthan ha u bnai wa dep da pynduna ko yaka VAT yong i Petrol wa Diesel da 2% hadien wa ku i dor Premium Petrol palat T. 100 chi liter ha Sri Ganganagar District. Hanla pynduna leh, ka jylla da em ko yaka VAT wa heh dooh iwa da tam 36% najrong ka T. 1,500 chi kiloliter ka Road Cess iwa kheiñ ha i Petrol. Ha i Diesel, ka jylla da booh ko 26% ka VAT wa T. 1,750 chi kiloliter ka Road Cess.
I dor Petrol wa Diesel ha waroh ka ri toh iwa chong haka yaw wei da em leh ya kawi ka Central Excise Duty hapoh ka ri, tangwa da yaphær dor na kawi ka jylla cha kawi neidaw wa phær i dan wa da booh da ki jylla lane ka VAT. Ka sorkar pyrdi da booh ko T. 32.98 chi liter kam ka Excise Duty i Petrol wa T. 31.83 chi liter i Diesel. I dan wa kheiñ ka sorkar pyrdi waki sorkar jylla da man ki palat 61% na i dor Petrol wa dai cha ki paidbah wa 56% i dor i Diesel.
Ka sorkar Rajasthan da ong ko wa i pynhiar dor yaka VAT da pyndooh nong ko T. 1000 klur chi snem yaka sorkar.
